फैलिँदै आँखा पाक्ने रोगः कोरोनाजस्तै सफाइ र सामाजिक दूरी कायम गर्न सुझाव

चितवन–चितवनसहितका जिल्लामा यतिबेला आँखा पाक्ने रोग निकै बढेर गएको छ। कतिपय पालिका शिक्षण संस्था बन्द गरेर रोग नियन्त्रणमा जुटेका छन्।चिकित्सकले कोभिड–१९ झैं हातको सरसफाइ, सामाजिक दूरी कायम गर्न सके रोगबाट बच्न सकिने सुझाएका छन्।

भरतपुर आँखा अस्पतालका आँखा रोग विशेषज्ञ डा. कुमुदिनी सुवेदीले आँखा पाक्ने रोग फैलिन नलिन कोभिड–१९ मा जस्तै हातको सरसफाइ र सामाजिक दूरीमा ध्यान दिनुपर्ने बताइन्। 

उनले भनिन्, ‘हामीले कोभिडको जस्तै समय समयमा हात धुनुपर्छ, हातले आँखा छुनु हुँदैन। संक्रमित बिरामीबाट टाढै रहनुपर्छ।’ आँखा पाक्ने रोग (पिंक आई डिजिज) विशेषतः वर्षा मौसममा बढी देखिने जनाउँदै उनले सामान्यतया भाइरसले नै यो रोग फैल्याउने गरेको बताइन्। उनले भनिन्, ‘एकै समय धेरै जनालाई हुने सरुवा रोगका रुपमा हामीले यसलाई लिएका छौं।’

यो रोग एकबाट अर्काेमा नजिकको सम्पर्क (क्लोज कन्ट्याक्ट) भएको ठाउँमा सर्ने डा. सुवेदीले बताइन्। उनले भनिन्, ‘छात्रावास, विद्यालय, अस्पताल, जेल (कारागार) जहाँ धेरै भीडभाड हुन्छ, त्यस्तो ठाउँमा एकबाट अर्काेमा सजिलै सर्ने बढी सम्भावना रहन्छ।’

यो रोग एक जनाबाट अर्काेमा फैलिन २४ घन्टादेखि एक साताजति समय लाग्ने जनाउँदै उनले तीन सातादेखि कसैकसैलाई एक महिनासम्म पनि दुःख दिने जानकारी दिइन्। उनले भनिन्, ‘बिरामी पहिलो पटक हामीकहाँ आउँदा आँखा बिझायो, बिहान उठ्दा आँखा सुनिएको देखियो, आँखा कचेराले टालियो, आँसु बढी आयो, उज्यालोमा हेर्न गाह्रो भयो भन्ने लक्षण लिएर आउनुहुन्छ।’

सुरुमा बिरामीको आँखा हेर्दा बाहिरी कोष सुनिएको, कचेरा लागेको, आँखा रातो भएको देखिने गरेको उनको भनाइ छ। आँखा पाक्ने रोगले गम्भीर बनाएको अवस्थामा यसले आँखाको नानी (कर्निया) मा मसिना–मसिना घाउ गराउन सक्ने उहाँले जानकारी दिइन्। उनले भनिन्, ‘आँखा पाकेको बिरामी देखिए त्यसबाट स्वस्थ मानिस टाढै बस्नु राम्रो रहन्छ।’ 

यसबाट बच्न कालो चस्मा प्रयोग गर्न उनको सुझाव छ। उनले भनिन्, ‘चस्माले रोकथाममा सहयोग त पु¥याउँछ, तर एकबाट अर्काेमा सर्दैन भन्ने हुँदैन।’ घरमा कसैलाई आँखा पाक्ने रोग भएको छ भने टाढै बस्नुपर्ने सुझाव उनको छ। उनले भनिन्, ‘बिरामीले चलाएका सामग्री रुमाल, तौलिया, सिरानीलगायत स्वस्थ मानिसले चलाउन हुँदैन।’ 

सकभर बिरामीलाई छुट्टै कोठामा राख्दा अझै राम्रो हुने उनको सुझाव छ। उनले भनिन्, ‘घरमा एउटै बाथरुम हुन्छ, बिरामीले आँखा पुछेर छोएका बत्तीको स्वीच, ढोकाको ह्यान्डीललगायतका ठाउँमा स्वस्थ मानिसले छोएर आँखामा छोइयो भने यो रोग सर्दछ।’

यो रोग लागेमा अस्पतालमै आएर जचाउन सुझाव दिँदै डा. सुवेदीले भनिन्, ‘परीक्षण नगरी मेडिकलमा गएर औषधी लिनुहुँदैन, मेडिकलमा गएर देखाउँदा आँखा विशेषज्ञले नहेर्न सक्छन्।’ कुनै कुनै घटनामा फर्मासिस्टले औषधी दिँदा केही नराम्रो दुर्घटना भएका जनाउँदै उनले आँखा पाक्ने रोग लागेपछि विशेषज्ञ चिकित्सकको राय लिएर मात्रै औषधी राख्न सुझाव दिइन्।–रासस