कालीकोटको रुडुगाउँमा अज्ञात रोग फैलिएपछि ३०० जना बिरामी परे

कालीकोट– कालीकोटको तिलागुफा नगरपालिका–१० रुडुगाउँमा अज्ञात रोगका कारण ३११ जना बिरामी परेका छन्। अज्ञात रोग फैलिएको जानकारी पाएपछि शुक्रबार जिल्ला अस्पताल र तिलागुफा नगर अस्पतालको चिकित्सकसहितको टोली रुडुगाउँ पुगेको छ।

चिकित्सकसहितको टोलीले बिरामीको स्वास्थ्य परीक्षण गरी औषधी वितरण गरेको जिल्ला जनस्वास्थ्य कार्यालयका सूचना अधिकारी कटक महतले जानकारी दिए।

‘बिरामीमा ज्वरो आउने, घाँटी र टाउको दुख्ने, घाँटीमा टन्सिल हुने, अनुहारमा दाग देखिने, हातखुट्टा सुनिनेलगायत लक्षण देखिएको छ। गाउँमा स्वास्थ्य शिविर सञ्चालन गरेका छौं’, उनले भने। ९ जना बिरामीको रगतको नमुना संकलन गरेर सुर्खेत पठाइएको महतले बताए। 

अधिकांश बिरामी महिला र बालबालिका रहेको तिलागुफा नगर अस्पतालका डा. टंकप्रसाद आचार्यले जानकारी दिए। ‘शुक्रबार १९४ महिला र ११७ पुरुषको स्वास्थ्य जाँच गरी औषधी वितरण गरेका छौं’, उनले भने, ‘उपचार गर्न आउने २०६ जना १५ वर्षमुनिका छन्।’ सबै बिरामीमा एउटै किसिमको लक्षण भएको डा. आचार्यले बताए।–रासस