जिप दुर्घटनामा सुदूरपश्चिमका कानुनमन्त्री सिंहको निधन

काठमाडौं- बझाङमा भएको जिप दुर्घटनामा परी सुदूरपश्चिम प्रदेशका आन्तरिक मामिला तथा कानुनमन्त्री पृथ्वीबहादुर सिंहको निधन भएको छ।

आज दिउँसो भएको दुर्घटनामा गम्भीर घाइते भएका मन्त्री सिंहको कोहलपुरमा उपचारका क्रममा मृत्यु भएको हो। सुदूरपश्चिम प्रदेश प्रहरी प्रमुख भरत बोहोराका अनुसार मन्त्री सिंहलाई चिकित्सकले साँझ साढे ५ बजे मृत घोषित गरेका थिए।

सिंहसहित दुर्घटनामा ज्यान गुमाउने ३ जना पुगेका छन्। दुर्घटनामा घाइते भएकी मन्त्री सिंहकी श्रीमती अमृतादेवी सिंह र भाउजू जयादेवी सिंहको यसअघि बझाङमै मृत्यु भएको थियो।

चालक धर्मराज जोशी र सुरक्षा गार्ड दीपक भण्डारीको भने उपचार भइरहेको छ। मन्त्री सिंह चढेको सुदूरपश्चिम प्रदेश ०१-००१ झ ४८० नम्बरको जीप धनगढीबाट बझाङ जाँदै गर्दा केदारस्युँ गाउँपालिकामा दुर्घटनामा परेको थियो।