स्लाइन चढाउन मानेनन् अनशनरत सांसद गौतमले, अवस्था नाजुक बन्दै

काठमाडौं- नेपाली कांग्रेसका सांसद सञ्जयकुमार गौतम ६ दिनदेखि आमरण अनशनमा छन्। बर्दियाको जब्दीघाट पुलमुनि १५ बुँदे माग राखेर उनी वैशाख ३० गतेदेखि अनशन बसेका हुन्।

बुधबारबाट गौतमको स्वास्थ्य अवस्थामा असर देखिन थालेको चिकित्सकले बताएका छन्। बर्दिया अस्पतालका मेडिकल सुपरिटेन्डेन्ट डाक्टर सुभाष पाण्डेयले गौतमको शरीरमा पानीको मात्रा घट्न थालेको जानकारी दिए।

स्वास्थ्य अवस्था नाजुक बन्दै गएपछि प्रमुख जिल्ला अधिकारी नारायण रिसाल, प्रहरी उपरीक्षक सुदीप शाहीलगायत चिकित्सकको टोली अनशनस्थल पुगेका थिए। सांसद गौतमले माग पूरा नभएसम्म स्लाइन पानी नचढाउने अडान राखेका छन्।

भौतिक पूर्वाधार तथा यातायात मन्त्री प्रकाश ज्वालाले सांसद गौतमलाई अनशन स्थगित गर्न आग्रह गरेका छन्। नयाँ पुलको टेन्डर १० दिनभित्र गर्ने आश्वासन मन्त्रीले दिएका छन्।