फूलैफूलको सहर बन्ला त भैरहवा ?

रुपन्देही- भगवान् गौतमबुद्धको जन्मस्थल लुम्बिनीको प्रवेशद्वार हो, भैरहवा। भैरहवाबाट लुम्बिनी २२ किलोमिटर पश्चिममा अवस्थित छ। बेलहिया नाका हुँदै विभिन्न देशका पर्यटक लुम्बिनी पुग्छन्। भगवान् गौतमबुद्धको बाल्यकालको नाम सिद्धार्थ (सर्वअर्थसिद्ध) बाट यस नगरपालिकाको नामकरण गरिएको छ। 

सांस्कृतिक परम्परा र मान्यता साहित्य, भाषा, कला, धर्म, संस्कृतिको साँझा संगमका रूपमा नगरपालिका रहेको छ। नगरपालिका नेपाल र भारतको सिमानामा पर्ने एक महत्वपूर्ण पर्यटकीय, व्यापारिक र औद्योगिक केन्द्रको रूपमा स्थापित छ। 

पैदलमार्ग हुँदै भित्रिने सबैभन्दा बढी पर्यटक यही नाकाबाट हुँदै भैरहवा आउँछन्। भैरहवा ऐतिहासिक सहर हो। यसलाई फूलैफूलको सहर बनाउन नगरपालिकाले अभियान थालेको पनि एक वर्ष पूरा भएको छ। भैरहवा मात्रै होइन, सिंगो सिद्धार्थनगर नगरपालिकालाई नै फूलैफूलको सहर बनाउने योजना नगरपालिकाको छ। जसका लागि गत वर्षदेखि वृक्षरोपण अभियान चलाइएको छ।

गत वर्ष नगरप्रमुख इस्तियाक अहमद खान प्रमुख पदमा निर्वाचित भएपछि आफूले पाएको मतबराबर वृक्षरोपण गर्ने घोषणा गरेका थिए। उनी नौ हजार एक सय ३४ मत प्राप्त गरी निर्वाचित भएका थिए। 

भैरहवालाई हराभरा र फूलको सहरको रूपमा स्थापित गर्न सबैसँग समन्वय गरी काम गरिरहेको उनको भनाइ छ। नगरलाई ‘क्लिन’, ‘ग्रिन’ र ‘इको फ्रेन्ड्ली सिटी’ बनाउन विभिन्न क्षेत्रमा बिरुवा लगाइएको छ।

सिद्धार्थ राजमार्ग, बैंकरोड, नारायणपथ, मिलनचोक, बेलहिया, देवकोटाचोक, बुद्धचोकलगायतका क्षेत्रलाई हरियाली बनाउने योजना नगरपालिकाको छ। 

राजमार्गको दुवै किनार र बीचभाग (डिभाइडर) तथा बजार क्षेत्रको सडकको दुवै किनारमा फूल–रूखका बिरुवा लगाउने काम भइरहेको नगरपालिकाकी उपप्रमुख उमा अधिकारी बताइन्।    
-नीरू गौतम/रासस