सवारी दुर्घटनामा पाँचको मृत्यु, अन्य कारणले ६ जनाको ज्यान गयो

काठमाडौं- देशका विभिन्न स्थानमा भएका सवारी दुर्घटनामा पाँच जनाको मृत्यु भएको छ भने अन्य कारणले ६ जनाको ज्यान गएको प्रहरीले जनाएको छ। 

प्रहरीका अनुसार काठमाडौं, तारकेश्वर नगरपालिका-११ शेषमती सडकमा बा.३ ख ६३६७ नम्बरको बसले बा.४९ प ७०१ नम्बरको मोटरसाइकललाई बुधबार दिउँसो ठक्कर दिँदा मोटरसाइकल चालक सप्तरी रुपनी गाउँपालिका-३ घर भई ललितपुर ईमाडोल बस्ने ५७ वर्षीय जोगेन्द्र प्रसाद गुप्ताको मृत्यु भएको छ।

दुर्घटनामा गम्भीर घाइते भएका उनको ग्रिनसिटी अस्पताल बसुन्धारामा उपचारको क्रममा मृत्यु भएको हो। दुर्घटनामा घाइते भएका बसमा सवार ९ जनामध्ये ७ जना उपचार पश्चात डिस्चार्ज भएका छन् भने अन्य २ जनाको ग्रिनसिटी अस्पताल बसुन्धारामा उपचार भइरहेको छ। हाल फरार बस चालकको प्रहरीले खोजी गरिरहेको छ।

नुवाकोट, शिवपुरी गाउँपालिका-१ तलाखुस्थित सडकमा बा.प्र.०२-०३७ प १६३० नम्बरको मोटरसाइकल अनियन्त्रित भई बुधबार दिउँसो दुर्घटना हुँदा चालक सिन्धुपाल्चोक मेलम्ची नगरपालिका-४ बस्ने ४२ वर्षीय विनोद श्रेष्ठको मृत्यु भएको छ। दुर्घटनामा गम्भीर घाइते भएका उनको आधारभूत अस्पताल शिवपुरीमा उपचारको क्रममा मृत्यु भएको हो।

रूपन्देही, मायादेवी गाउँपालिका-४ मोतिपुरस्थित सडकमा बागमती प्रदेश ०१- ०२७ च ११४४ नम्बरको भ्यानले लु.२ प ७५७८ नम्बरको मोटरसाइकललाई बुधबार दिउँसो ठक्कर दिँदा मोटरसाइकल चालक सोही गाउँपालिका-५ बस्ने ६० वर्षीय खलिल धुनिया मुसलमानको मृत्यु भएको छ। दुर्घटनामा गम्भीर घाइते भएका उनको भिम अस्पताल भैरहवामा उपचारको क्रममा मृत्यु भएको हो। प्रहरीले भ्यान चालकलाई नियन्त्रणमा लिएको छ।

यसैगरी रुपन्देही, बुटवल उपमहानगरपालिका-२ पाखापानीस्थित सडकमा लु.६३ प ८१८५ नम्बरको मोटरसाइकल अनियन्त्रित भई सडकबाट करिब ६ मिटर तल खसेर बुधबार राति दुर्घटना हुँदा चालक प्युठान झिमरुक गाउँपालिका-५ बस्ने ५० वर्षीय श्रीधर पोखरेलको मृत्यु भएको छ। दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो।

पर्सा, छिपरमाई गाउँपालिका-५ भिस्वास्थित सडकमा बीआर ५ ए ८३३२ नम्बरको मोटरसाइकल अनियन्त्रित भई बुधबार दिउँसो दुर्घटना हुँदा मोटरसाइकलमा सवार पकाहामैनपुर गाउँपालिका-५ सबैठवा बस्ने ३७ वर्षीया ईन्दु देवीको मृत्यु भएको छ। दुर्घटनामा गम्भीर घाइते भएकी उनको उपचारको लागि एलएस न्यूरो अस्पताल वीरगंजतर्फ लैजाने क्रममा बाटोमै मृत्यु भएको हो। प्रहरीले मोटरसाइकल चालकलाई नियन्त्रणमा लिएको छ। दुर्घटनाका सम्बन्धमा प्रहरीले आवश्यक अनुसन्धान गरिरहेको छ।

चट्याङ लागेर मृत्यु
म्याग्दी, मंगला गाउँपालिका-३ सातबिसे घर भएकी ६० वर्षीया जगदेवी बिकको सोही ठाउँ घामटाङस्थित छोरीको घरमा आएको अवस्थामा चट्याङ लागेर बुधबार दिउँसो घटनास्थलमै मृत्यु भएको छ। यस सम्बन्धमा प्रहरीले आवश्यक अनुसन्धान गरिरहेको छ।

मृत फेला 
काठमाडौं, कीर्तिपुर नगरपालिका-८ पांगा सालिक डेरा गरी बस्ने कञ्चनपुर घर भएकी २८ वर्षीया सरिता भट्ट आफ्नै कोठामा बुधबार मृत अवस्थामा फेला परेकी छिन्। यसैगरी काठमाडौं महानगरपालिका-१४ कलंकीस्थित द लुम्बिनी गेष्ट हाउसमा कोठा लिई मंगलबार बेलुकीदेखि बसेका नुवाकोट घर भएका ६० वर्षीय सिताराम कडेल बुधबार मृत अवस्थामा फेला परेका छन्। यस सम्बन्धमा प्रहरीले आवश्यक अनुसन्धान गरिरहेको छ।

डुबेर मृत्यु
दाङ, तुलसीपुर उपमहानगरपालिका-१७ बगौसी बस्ने रोल्पा रुन्टिगडी गाउँपालिका-६ घर भएका तिलसरी बोहराको छोरा १० वर्षीय बसन्त बोहराको सोही ठाउँस्थित खाल्डोमा जमेको पानीमा डुबेर बुधबार साँझ मृत्यु भएको छ।

सोही ठाउँस्थित हापुर खोलामा नुहाउन गएको अवस्थामा उक्त खोलामा बृहत सिंचाई योजनाको लागि जेसिबीले खनेको खाल्डोमा जमेको पानीमा डुबेर गम्भीर घाइते भएका उनको राप्ती प्रादेशीक अस्पताल तुलसीपुरमा उपचारको क्रममा मृत्यु भएको हो। यस सम्बन्धमा प्रहरीले आवश्यक अनुसन्धान गरिरहेको छ।

करेन्ट लागेर मृत्यु
सुनसरी, ईटहरी उपमहानगरपालिका-१६ मेजर टोलस्थित सूर्य प्लाई फ्याक्ट्रीमा काम गर्ने सप्तरी कंकालिनी माई नगरपालिका-१ भारदह बस्ने ३० वर्षीय सन्जित मुखियाको करेन्ट लागेर बुधबार साँझ मृत्यु भएको छ।

पानीको कल चलाउने क्रममा मोटरबाट करेन्ट लागेर गम्भीर घाइते भएका उनको नोबेल अस्पतालमा उपचारको क्रममा मृत्यु भएको हो। यस सम्बन्धमा प्रहरीले आवश्यक अनुसन्धान गरिरहेको छ।