कर्णाली याक्सले काठमान्डु गोर्खाजलाई दियो १५० रनको लक्ष्य

काठमाडौं । नेपाल प्रिमियर लिग एनपीएलमा कर्णाली याक्सले काठमान्डु गोर्खाजलाई १५० रनको लक्ष्य दिएको छ।

कीर्तिपुरस्थित त्रिवि अन्तर्राष्ट्रिय क्रिकेट स्टेडियममा जारी खेलमा पहिले ब्याटिङ गरेको कर्णालीले २० ओभरमा ७ विकेटको क्षतिमा १४९ रन बनाएर १५० रनको लक्ष्य दिएको हो।

कर्णालीका लागि गुल्सन झाले उत्कृष् पारी खेले। उनले २२ बलमा नटआउट ४९ रन बनाए। पवन सर्राफले ३५ र मार्क वाटले ३० रन जोडे। नजिबुल्लाह जदरानले १२ रन बनाए। अन्य खेलाडीले दोहोरो अंक छुन सकेनन्।

कर्णालीको सुरूवात भने खराब रह्यो। पहिलो बलमै ओपनर प्रियांक पाञ्चाल करण केसीको बलमा कट एन्ड बउल्ड भए हुँदा रोयल डक भए। पहिलो ओभरकै अन्तिम बलमा विलियम बोसिस्टोलाई शाहब आलमले रनआउट गरेपछि उसले पहिलो ओभरमै दुई विकेट गुमायो।

त्यसपछि तेस्रो विकेटका लागि मार्क वाट र पवन सर्राफले ५८ रनको साझेदारी गरे। वाट पनि नवौं ओभरमा भीम सार्कीबाट डाइरेक्ट हिटमार्फत् रनआउटको सिकार बने। उनले ३० रन बनाउने क्रममा २७ बलमा १ चौका र २ छक्का प्रहार गरे।

पवन सर्राफले ३५ रन बनाउने क्रममा २९ बलमा २ चौका र २ छक्का प्रहार गरे। उनी १२औं ओभरको पहिलो बलमा सन्तोष यादवको एलबिडब्लूको धरापमा परे। नाजिबुल्लह जाद्रान १४ बलमा १२ रन बनाएर पेभिलियन फर्के।

कप्तान सोमपाल कामी ६ रनमा मिलिन्द कुमारबाट कट एन्ड बउन्ड भएका थिए। १९औं ओभरको अन्तिम बलमा दिपक डुम्रे १० रनको स्थितिमा रशिद खानबाट बोल्ड भए।

बलिङमा काठमान्डुका रशिद खानले २ विकेट लिए। उनले ४ ओभरमा ३७ रन दिए। करण केसी, मिलिन्द कुमार र सन्तोष यादवले १–१ विकेट लिए।

पाँच खेलमा तीन जित निकालेको काठमान्डुका लागि प्लेअफमा पुग्न आजको खेल महत्वपूर्ण छ।‍ चार खेलमा एक मात्र जित निकालेको कर्णालीले प्लेअफ सम्भावना बनाइराख्न आजको खेल जित्नै पर्ने अवस्था छ।