छुट्टाछट्टै सवारी दुर्घटनामा १० जनाको मृत्यु

सुर्खेत, बिरेन्द्रनगर नगरपालिका-१४ रातानाङला भन्ने स्थानमा दैलेखबाट सुर्खेततर्फ आउँदै गरेको क.प्र.००१ख ९९८ नम्बरको फोर्स गाडी सडकबाट करिब १ सय मिटर तल खसेर शुक्रबार दिउँसो दुर्घटना हुँदा गाडीमा सवार ४ जनाको मृत्यु भएको छ।

दुर्घटनामा गम्भीर घाइते भएका उनीहरूको कर्णाली प्रदेश अस्पताल कालागाउँमा उपचारको क्रममा मृत्यु भएको हो। दुर्घटनामा घाइते भएका गाडीमा सवार ९ जनाको सोही अस्पतालमा उपचार भइरहेको छ भने १० जना उपचार पश्चात डिस्चार्ज भएका छन्। साथै गाडीमा सवार अन्य ११ जनालाई उपचारको लागि नेपालगंजतर्फ पठाइएको छ।

मुस्ताङ, थासाङ गाउँपालिका-४ अन्नपुर्ण चेकपोष्ट अगाडि सडकमा पोखराबाट जोमसोमतर्फ जाँदै गरेको ग.१ ख ६७४५ नम्बरको बसको ठक्करबाट पैदलयात्री म्याग्दी धवलागिरी गाउँपालिका-६ मराङ गाउँ बस्ने ५० वर्षीय सम बहादुर बिकको शुक्रबार दिउँसो मृत्यु भएको छ। दुर्घटनामा गम्भीर घाइते भएका उनको गण्डकी अस्पताल पोखरामा थप उपचारको क्रममा मृत्यु भएको हो। बस चालकलाई प्रहरीले नियन्त्रणमा लिएको छ।

पाँचथर, हिलिहाङ गाउँपालिका-६ ढकाल गाउँस्थित सडकमा ताप्लेजुङदेखि फिदिमतर्फ जाँदै गरेको ना.४ ख ७१२३ नम्बरको ट्रक शुक्रबार दिउँसो दुर्घटना हुँदा ट्रकमा सवार हिलिहाङ गाउँपालिका-३ बस्ने ५६ वर्षीय भवानी शंकर पौडेलको मृत्यु भएको छ। दुर्घटनामा गम्भीर घाइते भएका उनको जिल्ला अस्पताल पाँचथर फिदिममा उपचारको क्रममा मृत्यु भएको हो। साथै दुर्घटनामा घाइते भएका ट्रक चालक समेत २ जनाको बिएण्डसी अस्पताल झापामा उपचार भइरहेको छ।

महोत्तरी, बर्दिबास नगरपालिका-५ टुटेश्वर जंगलस्थित सडकमा ना.८ ख ३१६ नम्बरको टिपरले ना.४ त ६८२३ नम्बरको ट्याक्टरलाई शुक्रबार साँझ ठक्कर दिँदा ट्याक्टरको ट्रलीमा सवार सर्लाही ईश्वरपुर नगरपालिका-१२ बस्ने ३५ वर्षीय सन्तोष मगरातीको मृत्यु भएको छ। दुर्घटनामा गम्भीर घाइते भएका उनको शुभ स्वस्तिक अस्पताल बर्दिबासमा उपचारको क्रममा मृत्यु भएको हो। साथै दुर्घटनामा घाइते भएका ट्याक्टरको ट्रलीमा सवार अन्य ४ जनाको सोही अस्पतालमा उपचार भइरहेको छ। दुवै सवारी साधनका चालकलाई प्रहरीले नियन्त्रणमा लिएको छ।

सर्लाही, ईश्वरपुर नगरपालिका-१ स्थित सडकमा शंकरगंजबाट मोहनगंजतर्फ जाँदै गरेको प्र.२-०२-००२ प ५८८२ नम्बरको मोटरसाइकलको ठक्करबाट पैदलयात्री ब्रहम्पुरी गाउँपालिका-७ बस्ने ७० वर्षीया देवकी महतोको शुक्रबार साँझ मृत्यु भएको छ। दुर्घटनामा गम्भीर घाइते भएकी उनको प्रादेशिक अस्पताल मलंगवामा थप उपचारको क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।

धनुषा, मिथिला बिहारी नगरपालिका-२ पुरनदाहा चोकस्थित सडकमा जनकपुरबाट धनुषाधामतर्फ जाँदै गरेको प्र.२-०२-००२ प ४६१५ नम्बरको मोटरसाइकलको ठक्करबाट पैदलयात्री सोही ठाउँ बस्ने ४९ वर्षीय बिनोद यादवको शुक्रबार राति मृत्यु भएको छ। दुर्घटनामा गम्भीर घाइते भएका उनको प्रादेशिक अस्पताल जनकपुरमा उपचारको क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।

बागलुङ, ढोरपाटन नगरपालिका-३ टारीबान्द्रे भिरस्थित सडकमा बुर्तिबाङदेखि घोसातर्फ जाँदै गरेको लु.१ च ६९३८ नम्बरको पिकअप जिप अनियन्त्रित भई शुक्रबार राति दुर्घटना हुँदा चालक ढोरपाटन नगरपालिका-३ पुर्कोट बस्ने ३६ वर्षीय किसान बिकको घटनास्थलमै मृत्यु भएको छ। दुर्घटनाका सम्बन्धमा प्रहरीले आवश्यक अनुसन्धान गरिरहेको छ।