पर्यटकको पर्खाइमा सौराहाका होटल व्यवसायी

चितवन- सौराहास्थित राप्ती नदीको किनारमा रहेको सनसेट होटलको नदी तटीय क्षेत्रमा बाढीले बगाएर पाँच फिट बढी गहिरो भएको थियो। आज बिहान सौराहा पुग्दा बाढीले बनाएको खाल्डो पुरेर मिलाउने काम भइरहेको थियो। 

रेष्टुरेन्टका सञ्चालक दीपेन्द्र खतिवडाका अनुसार बाढीले गहिरो खाल्डो बनाएको थियो। उनले भने, 'अब करिब पूर्ववतः अवस्थामा आयो, भोलिबाट रेष्टुरेन्ट सञ्चालनमा ल्याउन सकिन्छ।' 

उनका अनुसार हरेक वर्ष नदी तटीय क्षेत्रमा बाढी आउने भए पनि यस वर्ष अलि बढी क्षति भएको छ। उनको सँगै १५ रेष्टुरेन्ट बाढीले असर पुर्‍याएको छ।

रेष्टुरेन्ट सञ्चालकको छाता संस्था क्षेत्रीय रेष्टुरेन्ट एण्ड बार एसोसिएसन (रेवान) का अध्यक्ष ध्रुव गिरीका अनुसार अधिकांश क्षति पुगेका रेष्टुरेन्ट मर्मत र सरसफाइ गरेर सञ्चालनमा आउन थालेका छन्।

उनले भने, 'बाढीपछि अब हामी पर्यटकको पर्खाईमा छौँ।' बालुवा र पाँगो माटोले कतै भरिएको तथा कतै बाढीले खोतलेका ठाउँ र संरचना मर्मतसम्भारको काम अन्तिम चरणमा पुगेको छ।

क्षेत्रीय होटल संघ सौराहाका अध्यक्ष गंगा गिरीका अनुसार राप्ती किनारका केही होटलमा नदीको बाढी पसेको थियो। ठूलो क्षति नभए पनि आंशिक क्षति केही होटलमा पुगेको थियो।

होली लज, सपना भिलेज, होटल रिभर साइड लगायतका होटलमा बाढी पसेको थियो। ती होटलको पनि सरसफाइ र मर्मत गरिसकिएको उनले जानकारी दिए। उनले भने, 'बाढीका कारण अहिले सौराहाका कुनै होटल बन्द छैनन्।'

गत शुक्रबार र शनिबार परेको अविरल वर्षाले धेरै राजमार्गमा क्षति पुगेपछि त्यसको प्रत्यक्ष प्रभाव यहाँको पर्यटन क्षेत्रमा परेको छ। गिरीका अनुसार अहिले सौराहामा बढीमा ५ सय पर्यटक छन्। गत वर्ष यही समयमा दैनिक चार हजारभन्दा बढी पर्यटक हुने गर्थे। तीमध्ये आधा तेस्रो मुलुकका, ३० प्रतिशत नेपाली र २० प्रतिशत चिनियाँ पर्यटक हुने गरेको उनले जानकारी दिए।

लामो समय बस्ने पर्यटकलाई भिसा निःशुल्क गर्न र चितवन राष्ट्रिय निकुञ्ज प्रवेशको टिकट काटेपछि सात दिन हुने व्यवस्था गर्न सकेमा पर्यटकको सङ्ख्या बढ्ने उनी बताउँछन्। अहिले हरेक दिन निकुञ्जको टिकट काट्नुपर्ने हुन्छ। टिकटको अवधि बढाएमा सौराहासहित पश्चिम चितवन, माडी र चेपाङ मार्गमा पर्यटकको सङ्ख्या बढ्ने उनको भनाइ छ।

संघका पूर्वअध्यक्ष सुमन घिमिरे यस वर्ष बाढी नआउँदा पनि उत्साह नदेखिएको भन्दै बाढी आएपछि थप प्रभावित भएको बताउँछन्। उनले भने, 'विश्व बजारमा नेपालमा घुम्ने रुचि कम भएको पाइयो।'

विदेशी पर्यटकको सङ्ख्या घटेको र नेपाली आउने समयमा बाढीका कारण बाटो अवरुद्ध हुँदा समस्या भएको उनी बताउँछन्। उनले भने, 'बाटो बन्द छन्, जहाजको टिकट महँगो छ, त्यो पनि  पाइँदैन, पर्यटक कसरी आउन सक्नु?'

संघका महासचिव गुणराज थपलिया यस वर्षको मुख्य यामको सुरुवातीमा पर्यटकको आगमनमा निकै आएको बताउँछन्। त्यसका कारण पर्यटनसँग सम्बन्धित क्षेत्र प्रभावित बनेको उनको भनाइ छ।

सौराहामा ४५ निजी हात्ती छन्। ठूलो सङ्ख्यामा जीप, डुंगा सबै प्रभावित बनेका छन्। यहाँका १ सय ३८ होटल, १ सय हाराहारी रेष्टुरेन्टमा अर्बौँको लगानी छ। थपलियाका अनुसार एकै रातमा ६ हजार ६ सयभन्दा बढी अट्न सक्ने क्षमता सौराहामा छ। यद्यपि पर्यटक नहुँदा समस्या भएको उनी बताउँछन्। रासस