एनसेलको सेवामा समस्या, कम्पनीले माग्यो माफी

काठमाडौं- देशभर आज एनसेलको सेवामा समस्या आएको छ। एनसेलबाट हुने कल, एसएमस र इन्टरनेट सेवा केही समय अवरुद्ध भएको हो।

आफ्नो सेवामा समस्या आएपछि एनसेलले क्षमा माग्दै अवरुद्ध सेवा यथाशिघ्र सुरु गर्नका लागि तदारुकताका साथ काम भइरहेको जनाएको छ।

एनसेलका अनुसार दिउँसो ३:४८ बजेबाट सेवाहरू प्राविधिक समस्याका कारण अचानक अवरुद्ध हुन पुगेको हो।

'आज सोमबार, साउन २८ गते दिउँसो ३:४८ बजेबाट यस कम्पनीले प्रवाह गर्दै आएका सेवाहरु प्राविधिक समस्याका कारण अचानक अवरुद्ध हुन पुगेको अवगत गराउन चाहन्छौं । यसबाट पर्न गएको असुविधाका लागि हामी क्षमाप्रार्थी छौं र अवरुद्ध सेवा यथाशिघ्र सुचारु गर्नका लागि तदारुकताका साथ काम भईरहेको जानकारी गराउन चाहन्छौं,' कम्पनीले भनेको छ। अहिले सेवा सुचारु भइसकेको छ।