एसियाड क्रिकेटको क्वार्टरफाइनलमा भारतसँग नेपाल पराजित

चीनमा जारी १९औं एसियाडअन्तर्गत पुरुष क्रिकेटमा नेपाल भारतसँग २३ रनले पराजित भएको छ।

भारतले दिएको २०३ रनको लक्ष्य पछ्याएको नेपाल पूरा २० ओभर खेल्दै ९ विकेट गुमाएर १७९ रनमा समेटियो।

नेपालका लागि दीपेन्द्रसिंह ऐरीले १५ बलमा चार छक्कासहित ३२ र सन्दीप जोराले १२ बलमा ३ छक्कासहित २९ रन बनाए। कुशल भुर्तेलले २८, कुशल मल्ल २९ र आसिफ शेखले १० रन बनाए। कप्तान रोहित पौडेलले ३ रनमात्र जोड्न सके। सोमपाल कामी ७ र गुल्सन झा ६ रन बनाएर आउट भए।

नेपालले २९ रन जोड्दा पहिलो विकेट गुमाएको थियो। ७६-२ को अवस्थामा नेपालले एक रनको अन्तरमा दुई विकेट गुमाएको थियो। नेपालले खेलमा १४ छक्का र ११ चौका प्रहार गरेको थियो।

त्यसअघि टस जितेर ब्याटिङ थालेको भारतले निर्धारित २० ओभरमा ४ विकेट गुमाएर २०२ रन जोडेको थियो। 

यो हारसँगै एसियाडमा नेपालको क्रिकेट यात्रा सकिएको छ भने भारत सेमिफाइनलमा प्रवेश गरेको छ।