काठमाडौं– सरकारको उद्देश्यअनुरुप सशस्त्र प्रहरी र नेपाल प्रहरीले गोताखोर तयार पारेका छन्। यसपटक १९ सशस्त्र प्रहरी कर्मचारी र एक नेपाल प्रहरी गरी २० गोताखोर तयार गरिएको हो।
सशस्त्र प्रहरी बलका प्रवक्ता राजेन्द्र खड्काका अनुसार पाँच साताको उक्त तालिम त्रिशूली नदी, कास्कीको पोखरास्थित फेवाताल र सुनसरीस्थित कोसी नदीमा दिइएको थियो। यस वर्ष गण्डकी प्रदेश सरकारको सहयोगमा गत १० वैशाखदेखि सशस्त्र प्रहरीले २० प्रहरी कर्मचारीलाई पाँच हप्ते गोताखोर तालिम दिएको हो।
योसँगै सशस्त्र प्रहरी बल नेपालमा हाल ७४ गोताखोर तालिमप्राप्त जनशक्ति तयार भएको खड्काले बताए। सशस्त्र प्रहरी बलले गोताखोर परिचालन गरी हालसम्म २७३ घटनामा ८०२ जनाको जीवितै उद्धार तथा ३१७ शव निकालेको उनले जानकारी दिए।
यसअघि सशस्त्र प्रहरी बलले २५ सशस्त्र प्रहरी कर्मचारीलाई युएनडिपीको सहयोगमा बंगलादेशमा २०६९ वैशाखमा तीन महिने गोताखोर तालिम दिलाएको थियो।
गोताखोर तालिमप्राप्त जनशक्तिलाई थप विस्तार गर्दै लैजाने उद्देश्यअनुरुप सशस्त्र प्रहरी बल नेपाल नम्बर १ वराह वाहिनी मुख्यालयमा सुनसरीमा ९ असोज २०७६ देखि २५ कात्तिकसम्म १९ सशस्त्र प्रहरी कर्मचारीलाई नेपालमै पहिलोपटक गोताखोर तालिम प्रदान गरिएको थियो।
सशस्त्र प्रहरीको विपद् व्यवस्थापन तालिम शिक्षालयमा २५ देखि २९ जेठ २०७९ सम्म उनीहरूलाई गोताखोर तालिम दिइएको थियो।