टुकुचा ढल होइन, इच्छुमती खोला हो: अदालत

काठमाडौं- उच्च अदालत पाटनले काठमाडौं उपत्यकाको मध्यभाग भएर बग्ने इच्छुमती (टुकुचा) ढल नभई खोला नै भएको फैसला गरेको छ।

काठमाडौं महानगरपालिकाले जय नेपाल हलबाट कमलादी क्षेत्रसम्मको नदी छोपिएको भन्दै खुला गर्न सुरु गरेपछि अदालतमा मुद्दा परेको थियो। 

अदालतले गरेको फैसलाको पूर्णपाठमा खोला नै भन्ने उल्लेख भएपछि जग्गा प्राप्तिसम्बन्धी कानुनअनुसार नदीमाथिको जग्गा लिइएको हो वा होइन भनी नापी कार्यालयलगायत सरोकार भएका निकायसँग बुझ्न लागिएको महानगरपालिकाका प्रवक्ता नवीन मानन्धरले जानकारी दिए।

'खोला भएकाले यसको पहिचान हुन्छ। यससँग जोडिएको जमिन सार्वजनिक हुन्छ,' उच्च अदालतको पूर्णपाठबारे उनले भने। कानुनबमोजिम जग्गा प्राप्ति गरेको भए लगत कट्टा गर्ने महानगरपालिकाको तयारी छ। लगत कट्टापछि फेरि काम सुरु गर्ने मानन्धरले बताए।

अदालतका प्रवक्ता मन्दिरा शाहीले पनि टुकुचा ढल नभई खोला नै भएको फैसलामा उल्लेख गरिएको जानकारी दिइन्। महानगरपालिका प्रमुख बालेन्द्र शाहले आजै सामाजिक सञ्जालमा अदालतको फैसलापछि विधिसम्मत् तरिकाले महानगरपालिकाले सुरु गरेको खोला र त्यसको दायाँबायाँको जग्गाा संरक्षण गरिने उल्लेख गरेका छन्।