आइतबार, साउन २९, २०७९

नेतृत्वका आकांक्षी बढेपछि कांग्रेसमा सात गुट

तीर्थराज बस्नेत  |  काठमाडौं, बिहीबार, मंसिर १६, २०७८

तीर्थराज बस्नेत

तीर्थराज बस्नेत

बिहीबार, मंसिर १६, २०७८, काठमाडौं

नेपाल समय

काठमाडौं- दुई गुटमा विभक्त कांग्रेसमा १३औं महाधिवेशनपछि एउटा अर्को गुट थपियो। त्यसबेलाका तीन ध्रुव सक्रिय रहेकै अवस्थामा १४औं महाधिवेशनका बेला कांग्रेसमा चार गुट थपिने सम्भावना देखिएको छ। यसरी अबको महाधिवेशनपछि कम्तीमा ७ गुटमा कांग्रेस विभाजनोन्मुख छ। 

महाधिवेशनका कार्यक्रम सुरु हुनु अघिसम्म एकै ठाउँ देखिएको संस्थापन इतर समूहले मात्रै कम्तीमा ४ गुट जन्माउने देखिएको छ। महाधिवेशनका हालसम्मका गतिविधि र नेताहरूका अभिव्यक्ति केलाउने हो भने संस्थापन इतर समूहले रामचन्द्र पौडेल, महामन्त्री शशांक कोइराला, प्रकाशमान सिंह र शेखर कोइराला निकटका गुट बन्ने आकलन गर्ने आधार बनिसकेको छ।

यस्तै कांग्रेसको पछिल्लो सत्तायात्रा अघिसम्म एकजुट रहेको गुटलाई पनि विभक्त गराएर विमलेन्द्र निधिले नयाँ गुटको बीजारोपण गरिसकेका छन्। यद्यपि १४औँ महाधिवेशनमा हुने ध्रुवीकरणले कांग्रेसका गुटहरूको संख्या अझ खुम्च्याउन वा फैलाउन मद्दत गर्न सक्छ।

१४औं महाधिवेशनका कार्यक्रम गरिरहेको नेपाली कांग्रेसले बिहीबार प्रदेश अधिवेशन उद्घाटन गर्दैछ। यसअघि अधिकांश जिल्ला, प्रतिनिधि सभा निर्वाचन क्षेत्र, प्रदेश सभा निर्चावन क्षेत्र, पालिका र वडा अधिवेशन सम्पन्न भइसकेकाकाले केन्द्रीय महाधिवेशनको संघारमा पुगिसक्दा नेताहरू भने नयाँ समीरकरण बनाउन र भत्काउन व्यस्त छन्। 

आगामी महाधिवेशनबाट छानिने नेतृत्वले चार वर्षसम्म कांग्रेसको बागडोर सम्हाल्ने अवसर पाउने मात्र नभएर देशकै पुरानो राजनीतिक दलको इतिहाससँग पनि जोडिने भएकाले नेताहरूमा नेतृत्व गर्ने आकांक्षा पलाउनु स्वाभाविक हो। तर, यसपटक नेतृत्वमा आकांक्षा राख्ने नेताहरूको संख्या बढेकाले पनि गुटहरूको संख्या पनि त्यही अनुपातमा बढेको हो। नेतृत्व हत्याउने प्रयासमा लागेका नेताहरू क्रियाशील सदस्यता वितरण र वडा तहकै अधिवेशनदेखि नै आफ्ना मान्छे ल्याउन चाहन्छन्। यसैकारण महाधिवेशनका मतदाता रहने क्रियाशील सदस्यताको विवाद लामो समय बल्झिएको थियो। 

१४औँ महाधिवेशनमा हुने ध्रुवीकरणले कांग्रेसका गुटहरूको संख्या अझ खुम्च्याउन वा फैलाउन मद्दत गर्न सक्छ।

सभापतिका आकांक्षीहरूले वडा तहदेखिकै अधिवेशनलाई सुक्ष्म ढंगले नियालिरहेका छन्, अंक गणितको हिसाबकिताब राखेकै छन्। उनीहरुको सभापति बनेर सानेपा पस्ने इच्छा पूरा गर्ने सन्दर्भमा रणनीति बनाउन सघाउने भएकाले पनि तल्लो तहबाट आउने नेताहरूको अंकगणनामा चासो राख्छन्। हरेक राजनीतिज्ञले पार्टी सत्ता र राज्यसत्ताको नेतृत्व गर्ने इच्छा राख्छ नै। पार्टी सत्ताको नेतृत्वमा पुग्ने माध्यम पार्टीको महाधिवेशन हो र पार्टी सत्ता, राज्य सत्तामा पुग्ने माध्यम हो। 

अहिले कांग्रेसको विरासत आफ्नो पक्षमा पार्न कस्सिएका ७ जना नेताहरू आफ्नो पक्षमा सक्दो बढी नेता/कार्यकार्ता पार्न लालयित छन्। वर्तमान सभापति शेरबहादुर देउवा पार्टी सत्ता जोगाउने ध्याउन्नमा रहँदा सभापतिका आकांक्षी अन्य नेता भने पार्टी नेतृत्वबाट देउवालाई हटाउन प्रयत्नशील छन्। अहिलेसम्मको स्थितिलाई मूल्यांकन गर्ने हो भने कांग्रेसमा १३औं महाधिवेशनको तुलनामा यसपटक गुटको संख्या दोब्बरभन्दा बढी पुग्ने देखिन्छ। 

कांग्रेस इतिहासका जानकार पुरुषोत्तम बस्नेत नेपाली कांग्रेसमा पहिलेदेखि नै गुटहरू रहने गरेको बताउँछन्। 'कांग्रेसमा मतभिन्नतालाई पनि सम्मान गरिन्थ्यो। मतभिन्नता भएपछि गुट हुनु खासै नौलो होइन। कांग्रेसमा पहिले पनि गुट हुन्थे,' बस्नेतले भने। उनका अनुसार हालको जस्तो शक्तिमा पुग्नका लागि मात्र पहिले गुट बन्दैनथे। 'वैचारिक र नीतिगत मतभिन्नताका आधारमा गुट बन्थे। नीतिगत एकता भएपछि कतिपय गुट हराउँथे पनि,' बस्नेत थप्छन्, 'अहिलेका गुटमा कुनै वैचारिक कुरा छैन। नीतिगत विषयहरू न त कांग्रेसमा छलफल हुन्छन्। न त वैचारिक/नीतिगत मतभिन्नताका आधारमा नै गुट बन्छन्। बन्छन् त केवल शक्ति प्राप्त गर्न मात्र, आफ्नो शक्ति भजाउन मात्र। यस्ता गुटले कांग्रेसको सांगठनिक स्वास्थ्यलाई फाइदा गर्दैन।' 

उपगुट पनि उत्तिकै

सतहमा सभापतिका आकांक्षीपिच्छेका ७ गुट देखिएपनि कांग्रेसमा यो भन्दा धेरै संख्यामा शक्ति-समूह सक्रिय छन्। यी शक्ति-समूह पनि छोटो समयमा पनि अदलबदल भइरहन्छन्। कति बेला कुन गुट कता पुग्छ धेरै कांग्रेसी नेतालाई नै पनि पत्तो हुँदैन, नेताको पहुँचमा नभएको गुट अदलीबदलीको सूचना तल्लो तहका कार्यकर्ता र आम नागरिकलाई हुने कुरा भएन। त्यसैले कांग्रेस वृत्तमा धेरैले भन्ने गर्छन्- कांग्रेस पार्टी गुटहरूको महासंघ हो। 

गुटहरू पनि उपगुटको जालोभित्र छन्। १४औं महाधिवेशनमा गुटको रुपमा उदाउने तयारीमा छन्। उपसभापति विमलेन्द्र निधि, पूर्वमहामन्त्री प्रकाशमान सिंह र नेता शेखर कोइराला गुट निर्माणमा खटिएर लागेका नेताहरू हुन्। उनीहरूले विभिन्न उपगुटहरूलाई निकट बनाउने प्रयास गरिरहेका छन्। 

निधि लामो समय देउवा समूहमा सक्रिय रहँदै आएका नेता हुन्। तर, १४औं महाधिवेशनमा सभापति लड्ने उनको घोषणा गरेका छन्। त्यही घोषणाले उनको देउवासँग सम्बन्ध चिसिएको छ। निधिले सभापति लड्ने तयारीस्वरुप सम्पर्क कार्यालय मात्र खोलेका छैनन्, घोषणा पात्र नै सार्वजनिक गरिसकेका छन्।

र, उनले १४औं महाधिवेशनमा प्यानलसहित मनोनयन दर्ता गर्ने सार्वजनिक घोषणा गर्ने गरेका छन्। उनी अहिले देउवा पक्षकै विभिन्न क्लस्टरमा रहेका नेताहरूलाई तान्ने प्रयासमा छन्। खासगरी सभापति देउवाले आफ्नो टिम बनाउँदा असन्तुष्ट भएका नेताहरुको क्लस्टरलाई आफ्नो गुटमा ल्याउने प्रयासमा छन्। केही नेताहरूलाई निधिले आफ्नो पक्षमा ल्याइसकेको चर्चा कांग्रेसमा हुने गरेको छ।

गुटहरू पनि उपगुटको जालोभित्र छन्। १४औं महाधिवेशनमा गुटको रुपमा उदाउने तयारीमा छन्।

संस्थापन इतर समूहमा ‘तितरवितर’को अवस्था भएको माथि नै उल्लेख भइसकेको छ। संस्थापन इतर समूहको नेतृत्व वरिष्ठ नेता पौडेलले गरेका छन्। तर, त्यो समूहसँग सम्बन्धविच्छेद गर्ने कसरत पूर्वमहामन्त्रीले सिंहले गरिरहेका छन्। सार्वजनिक रुपमा उनले इतर समूहका नेता पौडेल र महामन्त्री शशांक कोइरालाविरुद्ध अभिव्यक्ति दिइरहेका छन्। 

उनले पौडेलका बारेमा भनेका छन्, ‘उहाँ (पौडेल) शेरबहादुर दाइको कार्यकर्ता बन्नुभयो, त्यसैले अब नेता मान्दिनँ। म आफैं सभापति लडछु।’ त्यसो त उनलाई फकाउने प्रयासमा संस्थापन इतर समूहबाट सभापतिका आकांक्षी रहेका नेताहरूले गरेका छन्। तर, सिंह पछि फर्कने अवस्थामा नरहेको उनी निकट स्रोत बताउँछ। उनले सभापति लड्ने तयारी अघि बढाएका छन्। उनले पछिल्लो समय दिएका अभिव्यक्ति र उनका गतिविधिले त्यसकै संकेत गर्छ। 

सिंहले सम्पादकहरुसँग अन्तरक्रिया गरेर भनेका छन्, ‘मरेँ भने हो पार्टी सभापतिमा मेरो उम्मेदवारी नपर्ने। नभए उम्मेदवारी त पर्यो पर्‍यो।’ उनले पार्टी शुद्धीकरण र सुदृढीकरणको अभियानमा साथ दिनेहरुसँग सहकार्य हुने बताएका छन्। तर, नेतृत्व छोडेर कसैसँग सहकार्य नगर्ने उनको भनाइ छ। ‘नेतृत्व छोडेर कसैसँग सहकार्य हुँदैन र उहाँ टिम बनाउने प्रयासमा हुनुहुन्छ,’ सिंहको सचिवालय भन्छ। 

त्यसो त संस्थापन इतर समूहबाटै सभापतिमा प्रतिस्पर्धा गर्ने इच्छा देखाएका शेखर कोइराला पनि टिम बनाउन बलियो उपगुटको खोजीमा छन्। खासगरी युवा नेताहरुको समर्थन जुटाएर अघि बढ्ने योजना उनको छ। सके संस्थापन इतर समूहबाटै साझा उम्मेदवार बन्ने नसके टिम (गुट) बनाएर अघि बढ्ने योजना शेखरको छ। सभापतिको दौडमा रहेका सबैले उपगुटहरूलाई प्रभावित गरी आफ्नो पक्षमा ल्याउने योजनामा छन्। 

नेतृत्व प्राप्तिको आकांक्षा र गुट निर्माण

कांग्रेस सभापति शेरबहादुर देउवाको निवास बूढानीलकण्ठमा बसेको पदाधिकारी बैठक। फाइल तस्बिर
कांग्रेसमा भइरहेको ध्रुवीकरण नेतृत्व प्राप्तिको आकांक्षासँग जोडिएको राजनीतिक विश्लेषक लोकराज बरालको भनाइ छ। राजनीतिक दलमा गुट सक्रिय हुन सामान्य कुरा भएपनि महाधिवेशनमा मुखमा जन्मने गुटको अभिलाषा नेतृत्व प्राप्तिसँग जोडिने उनको भनाइ छ। तर, ती गुट पार्टीको निर्वाचनपछि सक्रिय नरहन सक्ने सम्भावना पनि रहने बरालको टिप्पणी छ। 

‘राजनीतिक पार्टीमा गुट सक्रिय हुनु सामान्य कुरा हो। कांग्रेसको स्थापना कालदेखि नै गुटहरु सक्रिय छन्। जुन स्वभाविक पनि हो,’ विश्लेषक बराल भन्छन्, ‘तर, अहिले धेरै गुट देखिने अवस्था बनेको छ। यसलाई पनि सामान्य ढंगले नै हेर्नुपर्छ। अहिले गुट बन्छन्, चुनावपछि निष्क्रिय बनिहाल्छन्। यसरी गुटउपगुटको जन्म हुनुको पछि नेताहरुको नेतृत्वमा पुग्ने चाहना हो।’ 

नयाँ पुस्तासँगको डर 

त्यसो त कांग्रेसमा नेतृत्व जाम भएर बसेको छ। एकै पुस्ताले सधै‌ नेतृत्वमा दावी गरिरहने अवस्थाले नेतृत्वमा नयाँ पुस्ताको उदय हुने सम्भावना टर्छ पनि। जसका कारण कांग्रेसमा पुस्तान्तरणको बहस पनि भइरहेको छ। तर, पहिलो पुस्ताकै नेताले पुस्तान्तरणलाई स्वीकार गरेको देखिँदैन। कांग्रेसमा अहिलेको आवश्यकता पुस्तान्तरण नभएर रुपान्तरण भएको वरिष्ठ नेता पौडेलले बताउँदै आएका छन्। 

‘अहिलेको आवश्यकता पुस्तान्तरण होइन रुपान्तरण हो,’ पौडेलले भन्दै आएका छन्, ‘त्यसैले पुस्तान्तरणको बहस छोडेर नयाँ र पुरानो पुस्ताको फ्युजनका माध्यमबाट पार्टीको रुपान्तरण गर्न आवश्यक छ।’ तर, युवा नेताहरुले भने कांग्रेस जमेको पोखरी जस्तो भएकाले निकास दिन आवश्यक रहेको बताउँदै आएका छन्। 

त्यसो त यसपटक युवा पुस्ता पार्टीको पदाधिकारीमा आउने सम्भावना धेरै रहेको र त्यसले १५औं महाधिवेशनमा नेतृत्वमा पुग्न कठिन भएको निष्कर्षमा दोस्रो पुस्ता पुगेको छ। सोही कारण दोस्रो पुस्ताका नेताहरू यसपटक नेतृत्व हत्याउने प्रयत्नमा लागेका छन्। विश्लेषक बरालको बुझाइमा एकै व्यक्तिले सँधै नेतृत्वको चाहाना राख्दा अहिलेको अवस्थामा सिर्जना भएको हो। 

‘एकै व्यक्ति सँधै नेतृत्व तहमा पुग्दा वा पुग्न खोज्दा 'मोनोटोनस'को स्थिति पैदा हुन्छ। सोही कारण अहिलेको अवस्था सिर्जना भएको हो,’ उनी भन्छन्, ‘नेतृत्व गर्ने बलियो नेता नहुँदा पनि यस्तो अवस्था आउँछ।’

त्यसो त विधानको एउटा व्यवस्थाले पनि दोस्रो तहका नेताहरू झस्किरहेका छन्। र, विधानको यो व्यवस्था त्रुटिपूर्ण भएको उनीहरुको भनाइ छ। खासगरी पदाधिकारी लडेका र पराजित भएका नेता पाँच वर्ष केन्द्रीय समिति बाहिर रहनुपर्ने स्थिति विधानको व्यवस्थाले सिर्जना गर्छ। कांग्रेसको विधानमा पराजित नेताहरूलाई केन्द्रीय समितिमा मनोनीत गर्ने व्यवस्थाको परिकल्पना गरेको छैन। पराजित उम्मेदवार केन्द्रीय समितिमा मनोनीत हुन नपाउने विधानको यो व्यवस्था पार्टीका प्रभावशाली र वरिष्ठ नेताहरुका लागि हितकर छैन। 

यसपटक युवा पुस्ता पार्टीको पदाधिकारीमा आउने सम्भावना धेरै रहेको र त्यसले १५औं महाधिवेशनमा नेतृत्वमा पुग्न कठिन भएको निष्कर्षमा दोस्रो पुस्ता पुगेको छ। सोही कारण दोस्रो पुस्ताका नेताहरू यसपटक नेतृत्व हत्याउने प्रयत्नमा लागेका छन्।

तर, युवा नेतृत्व स्थापित गर्न यो व्यवस्था कडी बन्न सक्ने विश्लेषण भइरहेका छन्। ‘महाधिवेशनपछि केही वरिष्ठ नेताहरु बाहिर रहने कुरा पक्का हो। अर्को महाधिवेशन उहाँहरूका लागि अनुकूल नहुन पनि सक्छ। तर, यसले पार्टीमा युवा नेतृत्व स्थापित गर्न ठूलो सहयोग पुर्‍याउने देखिन्छ,’ एक युवा नेताले भने।  

राजनीतिक विश्लेषक डा. विष्णु दाहाल भने कांग्रेसको यो वैधानिक व्यवस्था नेपाली राजनीतिकै लागि सकारात्मक भएको बताउँछन्। ‘विधानको यो व्यवस्थाले युवालाई फाइदा गर्नेछ। पार्टीमा नयाँ पुस्ताले ठाँउ पाउनेछन्,’ उनी भन्छन्, ‘यो कांग्रेसका लागि मात्रै होइन, नेपाली राजनीतिकै लागि सकारात्मक कुरा हो। विधानको यो व्यवस्थाले दोस्रो पुस्ताका नेताहरुलाई झस्काएको छ र उनीहरु नेतृत्व लिन तम्सिएका छन्।’

कांग्रेसलाई नयाँ होइन गुट-उपगुट

congress central committee
कांग्रेस केन्द्रीय कार्याल सानेपामा बसेका केन्द्रीय समिति बैठक। फाइल तस्बिर
अहिलेको नेपाली कांग्रेसको स्थापना नै दुई फरक पार्टीको एकतापछि भएको हो। नेपाली राष्ट्रिय कांग्रेस र नेपाल प्रजातन्त्र कांग्रेसको एकीकृत रूप हो, आजको नेपाली कांग्रेस। त्यसैले स्थापनाकालदेखि नै कांग्रेस गुटगत राजनीतिबाट अछुतो रहन सकेन। 

नेपाली कांग्रेसको पाचौँ महाधिवेशन २००९ जेठ १० गतेदेखि जनकपुरमा सुरु हुने निर्धारण गरिएको थियो। त्यसबेला पनि कांग्रेसमा गुटहरू क्रियाशील थिए भन्ने विषय पुरुषोत्तम बस्नेतले उल्लेख गरेका छन्। 'मन्त्री सुवर्ण शमशेर, गणेशमान सिंह, सूर्यप्रसाद उपाध्याय र अन्य केही मन्त्रीहरू जेठ ८ गते जनकपुर पुगेका थिए। त्यसै दिन मन्त्री (तत्कालीन सरकारका यातायात तथा वनमन्त्री) भद्रकाली मिश्र पनि जनकुपर पुगेका थिए। तर उनी महाधिवेशन सम्पन्न गराउन होइन, त्यसलाई बिथोल्न र असफल पार्न त्यहाँ पुगेका थिए,' बस्नेतको पुस्तक नेपाली कांग्रेसको इतिहासको प्रारूपमा उल्लेख छ (पृ सं ४५२)।

महामन्त्री कृष्णप्रसाद भट्टराईले प्रतिवेदन प्रस्तुत गर्न लाग्दा मिश्रले ६ महिनापछि मात्र महाधिवेशन गराइयोस् भनेर प्रस्ताव लगेका थिए। 'उनले हिन्दीमा तयार पारिएको कांग्रेसको प्रस्तावित विधान पनि वितरण गरे। यसमा निकै विवाद र प्रतिवाद भयो। महाधिवेशन तत्काल गर्ने र नगर्ने दुई समूहमा नेपाली कांग्रेसलाई विभाजन गर्न खोजियो। आफ्नो प्रस्तावलाई टुंगोमा नपुर्‍याई कार्यक्रम अगाडि बढाउन पाइन्न भनेर मिश्रले कडा अडान लिए। पण्डालभित्रै बन्दसत्रमा आपसमा हात हालहाल भयो,' बस्नेतको पुस्तकमा उल्लेख छ। पछि मिश्रलाई कारबाही गरिएको थियो।  

कांग्रेसलाई गुटगत अभ्यास/प्रतिस्पर्धाले छोडेको छैन। कांग्रेसका संस्थापक बीपी-मातृकाबीचको टकराव होस् वा बीपी–सुवर्ण शमशेरबीचको अन्तरसंघर्ष नै किन नहोस्, त्यो गुटगत राजनीतिको परिणाम थियो। बीपीको निधनपछि पनि गिरिजाप्रसाद कोइराला र कृष्णप्रसाद भट्टराईले दुई गुटको नेतृत्व गरिरहे। पछि गिरिजाप्रसाद र शेबहादुर देउवा हुँदै सुशील कोइराला र देउवा गुट कांग्रेसमा सक्रिय हुन पुगे। १३औं महाधिवेशनयता देउवा र रामचन्द्र पौडेल गुट मात्रै रहन सकेन। र, पौडेल गुट फुटेर ‘तेस्रो धार’का नाममा सिटौलाले छुट्टै गुट जन्माएका थिए। १४औँ महाधिवेशनबाट कति गुट थपिने हुन् भन्ने विषय चाहिँ महाधिवेशनपछि थप प्रष्ट बन्दै जानेछ। 


प्रकाशित: December 2, 2021 | 11:50:00 काठमाडौं, बिहीबार, मंसिर १६, २०७८

तपाईं को प्रतिक्रिया

तपाईं को प्रतिक्रिया

ट्रेंडिंग

निर्मला प्रकरण : 'शंकास्पद दोषी' विष्टको बचाउ गर्ने परिवार नै पीडित!

निर्मला हत्या प्रकरणमा प्रहरीले विष्टलाई दोषी करार गर्न खोजेको थियो। आरोप विष्टले स्वीकार पनि गरेका थिए। तर स्थानीयले विष्टको मानसिक सन्तुलन ठीक नभएको र प्रहरीले ‘भीआईपी’ अपराधी जोगाउन ‘निर्दोष’लाई 'बलिको बोको' बनाउन खोजेको भन्दै आन्दोलन गरेका थिए। त्यो भीडमा विष्टबाट यतिबेला दुर्व्यवहार भोगेकी किशोरीको परिवार पनि सहभागी थियो।

०६४ सालमा केपी ओलीलाई हराएका लिङ्देन खोज्दैछन् अर्को 'चान्स'

२०६४ सालको चुनावमा केपी ओलीलाई झापा क्षेत्र नम्बर ५ बाट हराएर चर्चामा आएका लिङ्देन पुनः उनैसँग आउँदो मंसिरको निर्वाचनमा भिड्ने मुडमा छन्।

'सहायक श्रीमान'ले जित्यो उत्कृष्ट डकुमेन्ट्री अवार्ड

अमेरिकाको एटलान्टामा अगस्त ४ देखि ७ सम्म भएको आठौं कब इन्टरनेसनल फिल्म फेस्टिभलमा पाण्डे निर्देशित ‘को–हजबेन्ड’लाई उत्कृष्ट अन्तर्राष्ट्रिय डकुमेन्ट्री फिल्म घोषणा गरिएको हो।

पञ्चायत र प्रजातन्त्रमा चुनाव गराएका सूर्यप्रसाद श्रेष्ठ, जसले बिर्सन सक्दैनन् यस्ता घटना

२०४३ को राष्ट्रिय पञ्चायतको चुनाव र प्रजातन्त्र पुनर्स्थापछिको बहुदलीय चुनाव गराउने अवसर पाएर राजा, कांग्रेस, कम्युनिस्टको रोजाइमा परेका पूर्वनिर्वाचन आयुक्त हुन् सूर्यप्रसाद श्रेष्ठ।

धरातल बिर्सिएका हुन् त धराने मेयरले?

मेयर साम्पाङका हरेक गतिविधि अपरिपक्व लाग्ने गरेका छन्। नीति निर्माण तहमा रहेका उनी घरी रुने, घरी केटाकेटी पाराले सामाजिक सञ्जालमा प्रस्तुत हुने बानीले कार्यपालिका सदस्यहरु आफूहरुलाई लाज लाग्ने गरेको बताउँछन्।

गाउँपालिकासँगको विवादले दुई ठूला सिमेन्ट उद्योगको उत्पादन प्रभावित, गुम्दै करोडौं राजस्व

कपुरकोट गाउँपालिकाले क्लिंकर उत्पादनमा प्रयोग हुने कच्चा पदार्थ चुनढुंगा बोक्ने टिपर सञ्चालनमा अवरोध गरेपछि दुई महिनादेखि सिमेन्ट उत्पादन प्रभावित भएको हो।

त्यसैले विश्वविद्यालयजस्तो छैन त्रिवि

राजनीतिक दलहरूको संगठित दोहन र आन्दोलनका नाममा विद्यार्थी संगठनहरूको निरन्तरको बार्गेनिङले त्रिविलाई खोक्रो बनाइरहेको छ।

प्रकाशमानले भने- फर्स्ट म्यान बनेर देशको विकास गर्ने चाहना छ

नेपाली कांग्रेसका नेता प्रकाशमान सिंहले प्रधानमन्त्री बनेर नेपालको विकास गर्ने चाहना प्रकट गरेका छन्।

कथा, किंवदन्ती र रीतिरिवाजको संयोजन रातो मच्छिन्द्रनाथलाई आँखैअगाडि कोर्दा...

रातो मच्छिन्द्रनाथको रथ निर्माणलाई प्रत्यक्ष हेरेरै १९ वटा चित्र कोरेकी सुशीलाले १६ चित्र भने १६ दिन लगातार बनाएकी थिइन्। उडान सीमाभन्दा बाहिर शीर्षक दिएर उनका चित्रलाई गत १७ जुलाईबाट म्युजियम अफ नेपाली आर्टले प्रदर्शनीमा ल्याएको छ।

काठमाडौं उपत्यकामा भूकम्पको धक्का महसुस

काठमाडौं उपत्यकामा भूकम्पको धक्का महसुस भएको छ।

थप समाचार

नेपाल समय
राजनीति

निर्वाचनका लागि आयोगमा हालसम्म ३९ दल दर्ता

सरकारले निर्वाचनको मिति घोषगा गरेलगत्तै आयोगले निर्वाचनमा भाग लिनको लागि दल दर्ता गर्न आह्वान गरेकोमा अहिलेसम्म ३९ दल दर्ता भएको प्रवक्ता शालिग्राम शर्मा पौडेलले बताए।
नेपाल समय
राजनीति

'एमालेले इलामका जनतालाई गुमराहमा राख्यो'

मंसिर ४ गते हुन गइरहेको प्रदेश र प्रतिनिधि सभा निर्वाचनका विषयमा कांग्रेस इलाम–काठमाडौं सम्पर्क समितिले आयोजना गरेको कार्यक्रममा बोल्दै कांग्रेस केन्द्रीय सदस्य एवम सांसद सुजाता परियारले पार्टीका आकांक्षीहरुलाई व्यवस्थापन गर्दै सबै एकढिका भएर अघि बढ्नुपर्ने बताइन।
नेपाल समय
राजनीति

प्रतिनिधिसभा र प्रदेशसभा सदस्य निर्वाचनका लागि ४० दल दर्ता, कांग्रेसले पनि थाल्यो प्रक्रिया

राष्ट्रिय मान्यता प्राप्त नेकपा (एमाले), लोकतान्त्रिक समाजवादी पार्टी (लोसपा), नेकपा (एकीकृत समाजवादी) लगायत दलले आसन्न निर्वाचनमा भाग लिने प्रयोजनका लागि दल दर्ता गराएको आयोगले जनाएको छ।
नेपाल समय
राजनीति

निर्वाचनमा स्वस्थ प्रतिस्पर्धा हुनुपर्छ : अध्यक्ष ओली

नेकपा एमालेका अध्यक्ष केपी शर्मा ओलीले निर्वाचनमा स्वस्थ प्रतिस्पर्धा हुनुपर्नेमा जोड दिएका छन्।
नेपाल समय
राजनीति

रचनात्मक विद्रोह गर्न शेखर समूहका कार्यकर्ताद्वारा नेताहरुलाई आग्रह

नेपाली कांग्रेसका नेता शेखर कोइराला समूहका कार्यकर्ताहरुले रचनात्मक विद्रोह गर्न आग्रह गरेका छन्। पछिल्लो समय भातृसंस्थामा सभापति शेरबहादुर देउवाले आफू अनुकूलका व्यक्तिहरुलाई मनोनय गरेपछि शेखर समूहका युवा तथा विद्यार्थीहरुले आफ्नो समूहका नेताहरुले रचनात्मक विद्रोह गर्न आग्रह गरेका हुन्।

सूचना विभाग दर्ता नं.

८५८-२०७५/७६

सम्पर्क

House -138, Suruchi Marg, New Baneshwor, Kathmandu, Nepal
फोन : +977-1-4790242 / +977-1-4790040
इमेल : nepalsamayanews@gmail.com
  • प्रबन्ध निर्देशक
    तरुणप्रताप शाह
  • प्रधान सम्पादक
    नारायण अमृत
  • महाप्रबन्धक
    जीवन तिम्सिना