मनै लोभ्याउने सडक किनारका ढकमक्क फूल

/assets/plugins/bower_components/fileman/Uploads/post_images/November/SaDakma_fulharu_4_.jpg

भैरहवा-फूल भन्नेबित्तिकै धेरैले अन्दाज लगाउने गर्दछन्, यो कि घरको फूलबारी, नर्सरी वा बगैंचामा ढकमक्क फुल्छ । तर रुपन्देहीका सडकमा तिहार नजिकिएसँगै फुलेका फूलहरुले गाडीमा हुइँकिनोई पनि गति सीमित गराउन बाध्य पारेका छन् । 

‘प्रकृतिको कमाल नै भन्नुपर्दछ, एक सय २० किमि प्रतिघन्टाको गतिमा सपरिवार सडकमा हुइँकिरहेको सेतो कलरको क्रेटा गाडीको गति एकैचोटि चालीसमा झरेछ । म त हेर्‍याहेर्‍यै भएँ,’ बुटवलबाट भैरहवातर्फ जाँदै गरेका गोपाल भण्डारीले तिलोत्तमा नगरपालिका १ अन्तर्गत पर्ने सडकखण्डको फूलबारी नियाल्दै भने । उनले एकछिन गाडी रोके, गाडीको सीसा खोले र एउटा तस्बिर खिचे । उक्त फूलबारी सरस्वती नगर टोल विकास संस्थाले व्यवस्थापन गरेको हो । 

नयाँ मिलमा फुलेका पहेँलपुर सयपत्रीले जसरी अटोमेटिक रुपमा चालकको मन लोभ्याएर गाडीको गति कम गरायो, त्यसैगरी शंकरनगर क्षेत्रका राताम्मे मखमली र चायाफूलले पनि सबैको मन लोभ्याएको छ । यस्ता फूलबारी भैरहवा बुटवल सडक खण्डमा धेरै ठाउँमा छन् ।

 

तिहारका बेला फूल भएन भन्दै नेपालीले लाखौँ मूल्यको कृत्रिम फूल भारतबाट आयत गरिरहेका छन् । भैरहवा भन्सार कार्यलयका सूचना अधिकृत कलिराम पौडेलका अनुसार तिहार लक्षित गरेर चालु वर्षमा मात्रै ४३ लाख ३८ हजार मूल्य ( १४,५०१ केजी) को कृत्रिम फूल भारतबाट भित्रिसकेको छ । यसैगरी सयपत्री लगायतका फूल एक लाख ९३ हजार (२२५० केजी) को भित्रिसकेको छ । गोवद्र्धन पूजाको दिनसम्म माला भित्रिने गरेको विगतका वर्षको तथ्यांकले देखाएको छ । 

राष्ट्रिय गौरवको आयोजना भैरहवा-वुटवल ६ लेन सडक जसलाई बेलहिया- बुटवल व्यापारिक मार्ग पनि भन्ने गरिन्छ । यो सडकको पुरानो नाम सिद्धार्थ राजमार्ग हो । भैरहवाबाट बुटवलसम्म आउन जान प्रत्येक तीन मिनेटमा बस बिहान ५ बजेदेखि साँझ ८ बजेसम्म उपलब्ध छन् । उक्त सडकखण्डमा ओमसतिया गाउँपालिकाको पडसरी, ठुटिपीपल र तिलोत्तमा नगरपालिकाको कोटिहवा, भलबारी, मंगलापुर, मणिग्राम, शंकरनगर क्षेत्र पर्दछन् । 

भैरहवा-बुटवल सडक खण्डको दायाँबायाँ लस्करै घर जोडिँदै गएका छन् । २० किलोमिटर लामो दूरीको उक्त सडक नेपाल-भारत सीमा क्षेत्र बेलहिया दसगजाको समथर भूभागसँग जोडिएको छ । बेलहिया नेपालमा स्थल मार्ग हुँदै सबैभन्दा बढी पर्यटक भित्रिने नाका पनि हो । नेपालको दोस्रो ठूलो भन्सार नाका भैरहवासमेत रहेको उक्त नाकादेखि भारतको गोरखपुर, लखनउ र दिल्ली जान सहज हुन्छ ।  








प्रतिक्रिया