कर्मचारीबाटै सुरक्षा चुनौती, सिंहदरबारमा उच्च सुरक्षा सतर्कता 

/assets/plugins/bower_components/fileman/Uploads/post_images/November/Singha_Dubar_ns.jpg

काठमाडौं- मुलुकको प्रमुख प्रशासनिक केन्द्र सिंहदरबारमा कर्मचारीबाटै सुरक्षा चुनौती बढेपछि उच्च सुरक्षा सतर्कता अपनाइएको छ । सेवाबाट हटाइएका करार, अस्थायी र ज्यालादारीमा कार्यरत कर्मचारी आन्दोलनका कारण सुरक्षा चुनौती बढेपछि अहिले सिंहदरबार प्रवेशको मुख्य द्वार दक्षिण गेट र कर्मचारी मात्र प्रवेश गर्ने पूर्वी गेटमा ठूलो संख्यामा प्रहरी तैनाथ गरिएको छ ।

सरकारले विभिन्न मन्त्रालय र सरकारी निकायमा कार्यरत अस्थायी, करार र ज्यालादारी कर्मचारीलाई गत साउनदेखि निष्कासन गरेको थियो । निष्कासित कर्मचारीले सिंहदरबारभित्रैबाट आन्दोलन गर्ने तयारी गरेको सूचना पाएपछि सिंहदरबारमा उच्च सुरक्षा सतर्कता बढाइएको सुरक्षा स्रोतले बतायो । पूर्वी गेटमा दंगा प्रहरी तैनाथ गरिएको छ भने दक्षिण गेटमा प्रहरीको संख्या बढाइएको छ । यस्तै सिंहदरबार प्रवेशमा थप कडाइ गरिएको छ । 

नेपाल सरकारी अस्थायी, करार तथा ज्यालादारी कर्मचारी श्रमिक संघका संयोजक कुमार राउतले देशभरका करिब ३२ हजार कर्मचारीको रोजीरोटी खोस्ने सरकारी निर्णयविरुद्ध आफूहरू कडा आन्दोलनमा उत्रिएको बताए । बिहीबार सिंहदरबारमा धर्नामा रहेका राउते शान्तिपूर्ण आन्दोलन दबाउन सरकारले ठूलो संख्यामा प्रहरी परिचालन गरेको आरोप लगाए । 

उनले करार कर्मचारीको परिचयपत्र खोसेर सिंहदरबार प्रवेशमा निषेध गरेर सरकार मुडभेड निम्ताउन उद्यत रहेको उनको भनाइ छ । संघीय मामिला तथा सामान्य प्रसाशन मन्त्रालयमा सरकार र आन्दोलन कर्मचारीबीच केहीबेरमा हुँदैछ । 

एक सय बढी दंगा प्रहरी परिचालन 

अहिले सिंहदरबारको मुख्य गेटमा एक सय बढी दंगा प्रहरी परिचालित छन् । स्रोतका अनुसार निष्कासनमा परेका कर्मचारीहरूको सिंहदरबार प्रवेश गरी निषेधित क्षेत्रमा प्रदर्शन गर्ने योजना रहेको जानकारी सुरक्षा निकायले पाएपछि त्यसलाई नियन्त्रण गर्न विभिन्न गेटमै सुरक्षाकर्मीको संख्या बढाइएको हो ।

दंगा प्रहरी रहेका त्रिपुरेश्वर र महाराजगन्जबाट गरी एक सयभन्दा बढी दंगा प्रहरी सिंहदरबारमा तैनाथ गरिएका छन् । 
 




प्रतिक्रिया