तीन करोड फेसबुक प्रयोकर्ताको विवरण चोरियो

/assets/plugins/bower_components/fileman/Uploads/post_images/October/facebook_data.jpg

सानफ्रान्सिस्को- सामाजिक सञ्जाल फेसबुकले आफ्ना करिब दुर्इ करोड ९० लाख प्रयोगकर्ताको व्यक्तिगत विवरणमा ह्याकरको पहुँच रहेको जनाएको छ। 

फेसबुकले यसअघि साइबर आक्रमणका कारण पाँच करोड प्रयोगकर्ताका एकाउन्टमा प्रभाव परेको जनाएको थियो। 'अहिले हामीले के थाहा पाएका छौं भने सोचिएभन्दा केही कम व्यक्तिलाई असर परेको छ,' फेसबुकका उपाध्यक्ष गाए रोसेनले भने।

पहिचान अझै नखुलेका केही ह्याकरले करिब एक करोड ५० लाख फेसबुक प्रयोगकर्ताको नाम, फोन नम्बर र इमेल ठेगाना चोरेको उनले जानकारी दिए। अरू एक करोड ४० लाख प्रयोगकर्ताका विवरण पनि जोखिममा छन्।

फेसबुकले साइबर आक्रमणकारीले प्रयोगकर्ताका अरु विवरणहरू जस्तै लिंग, धर्म, गृहनगर, जन्ममिति र स्थान तथा हालै भ्रमण गरेका ठाउँ पनि संकलन गरेको जनाएको छ। 

यस आक्रमणबाट फेसबुकले सञ्चालन गरेका मेसेन्जर, मेसेन्जर किड्ज, इन्स्टाग्राम, ह्वाट्सएप, ओक्युलस, वर्कप्लेस, पेजेज, पेमेन्टमा असर नगरेको कम्पनीले बताएको छ। 

क्यालिफोर्नियास्थित फेसबुक कम्पनीले यस घटनाका सम्बन्धमा अमेरिकी संघीय जाँच ब्युरो (एफबीआई), अमेरिकी संघीय व्यापार आयोग, आइरिस डाटा प्रोटेक्सन कमिसन तथा अरू निकायसँग छलफल थालेको छ।




प्रतिक्रिया