१३ वर्षीया किशोरीको बलात्कारपछि हत्या

13_year_child_rape_kanchanpur.jpg

धनगढी- कञ्चनपुरमा एक बालिकाको शव शंकास्पद अवस्थामा फेला परेको छ। भीमदत्त नगरपालिका-२ खोल्टी बस्ने १३ वर्षीया निर्मला पन्त मृत अवस्थामा फेला परेकी हुन्। 

प्रहरीका अनुसार पन्तको शव शुक्रबार बिहान भीमदत्त नगरपालिका-१८ पत्थपुरको उखुबारी भित्र फेला परेको हो। कञ्चनपुरका प्रहरी नायब उपरीक्षक ज्ञानबहादुर सेटीले उखुबारी भित्र नालामा शव आधा डुबेको अवस्थामा फेला परेको जानकारी दिएका छन्। 
 
शवको प्रकृति हेर्दा उनलाई बलात्कारपछि हत्या गरेको हुन सक्ने प्रहरीले जनाएको छ। बालिकाको पेन्टी र सुलवार एउटा खुट्टाबाट पुरै निकालेको अवस्थामा भेटिएको सेटीले जानकारी दिए। आफन्तले बिहीबार राती निर्मला हराएको खबर प्रहरीलाई गरेपछि प्रहरीले उनको खोजी कार्य थालेको थियो।
 
सडकको छेउमा उनले चलाउने साईकल तथा किताव भेटिएपछि शंका लागेर आसपासमा खोजतलास गर्दा प्रहरीले शव उखुबारीमा भेटेको जानकारी दिएको छ। उनी बिहीबार दिउँसो किताब बोकेर पढ्नको लागि बजारमा साथीको घरमा आएको र त्यहाँबाट २ बजे घर जान्छु भनेर निस्केको बुझिएको छ। उनी स्थानीय सरस्वती माविमा कक्षा ९ मा अध्ययनरत रहेको बुझिएको छ। 

घट्नास्थलका स्थानीयहरुले प्रहरी चौकीको माग गर्दै निर्मलाको शव लग्न नदिएर साढे २ बजे सम्म रोकेका थिए। शव अहिले पोष्टमार्टमका लागि महाकाली अञ्चल अस्पतालमा छ। प्रहरीले घट्नाबारे अनुसन्धान भइरहेको जनाएको छ।
 
कञ्चनपुरको कृष्णपुर नगरपालिका-८ शान्तिपुरकी १७ वर्षीया कविता विष्टको प्रमीले नै हत्या गरेको घट्ना सेलाउन नपाउँदै पुनः सोहि प्रकृतिको घट्ना घटेको छ। एक महिना पहिले कैलालीमा माया बिकको बलात्कार पछि हत्या भएको घट्ना पनि सेलाएको छैन। 



प्रतिक्रिया