करनकाे अलराउन्ड प्रदर्शनमा नेपालको दोस्रो जित, नेदरल्यान्ड्स ४ विकेटले पराजित

/assets/plugins/bower_components/fileman/Uploads/Trangle_Cricket.jpg

काठमाडौं- करन केसीले अलराउन्ड प्रदर्शन गरेपछि ओमानमा जारी पाँच राष्ट्रबीचको टी-२० सिरिजको आफ्नो दोस्रो खेलमा नेपालले नेदरल्यान्ड्सलाई साेमबार चार विकेटले पराजित गरेको छ। नेपालले नेदरल्यान्ड्सले दिएको १३४ रनको मध्यम लक्ष्य १ बलअगावै ६ विकेट गुमाएर पूरा गर्यो।

सातौं नम्बरमा ब्याटिङ गर्न आएका करन केसीले आक्रामक खेलेपछि नेपालको जित सम्भव भएको हो। उनले १४ बलमा ३ छक्का र १ चौका प्रहार गर्दै ३१ रनको योगदान दिए। यस्तै, कप्तान पारस खड्काले ३३ र विनोद भण्डारीले २६ रन जोडे । अन्य खेलाडीले दोहोरो अंकको रन जोड्न सकेनन्। 

त्यसअघि टस हारेर ब्याटिङकाे निम्ताे पाएकाे नेदरल्यान्ड्सले १९.३ ओभरमा १३३ रनमा अलआउट भएको थियो । नेदरल्यान्ड्सका लागि म्याक्स ओ डाउनले सर्वाधिक ४३ रन जोडे । उनले ४४ बलमा ४ चौका प्रहार गरे । त्यस्तै कालिन अच्कर्म्यानले २९, एन्टोनियस स्टालले २१, स्कर्ट एड्वार्डले १६ रनको योगदान दिए । अन्य ब्याट्सम्यानले दोहोरो अंकमा रन बटुल्न सकेनन्। 
https://www.nicasiabank.com/

नेदरल्यान्ड्सलाई मध्यम स्कोरमा रोक्न सन्दीप लामिछाने र करन केसीले चार–चार विकेट लिए। 

जितसँगै नेपाल अंकतालिकाको दोस्रो स्थानमा उक्लिएको छ। नेपालको दुई खेलबाट ४ अंक छ। समान अंक भए पनि रनरेटका आधारमा ओमान तालिकाको शीर्ष स्थानमा छ। यसअघि नेपालले हङकङलाई पनि चार विकेटले पराजित गरेको थियो।  

प्रतिक्रिया