भैरहवा–बैंकक सिधा उडानका लागि थाइल्यान्ड तयार 

/assets/plugins/bower_components/fileman/Uploads/bangkok_ambassador.jpg

थाईल्याण्ड स्थित नेपाली राजदूतावासमा राजदूत गणेशप्रसाद ढकाल लगायतसँग नेपाली पत्रकार टोली ।

बैंकक– निर्माणाधीन गौतमवुद्ध अन्तराष्ट्रिय विमानस्थलमा सिधा हवाई उडानको लागि थाई सरकार र त्यहाँका एअरलाइन्स सकारात्मक देखिएका छन् । 

गौतमवुद्ध अन्तर्राष्ट्रिय विमानस्थल (भैरहवा विमानस्थल) निर्माण सम्पन्न भएपछि त्यहाँबाट अन्तर्राष्ट्रिय उडानका लागि सरकारले विभिन्न देशका एअरलाइन्सहरुसँग आवश्यक छलफल र सम्झौता गरिरहेको छ । 

यसैबीच लुम्बिनीमा सबैभन्दा बढी पर्यटक आउने थाइल्यान्डसँग पनि भैरहवा–बैंकक सिधा उडानका लागि छलफल भइरहेको थाईल्यान्डका लागि नेपाली राजदूतावासले जनाएको छ । 

थाइल्यान्डकालागि नेपाली राजदूत गणेशप्रसाद ढकालले थाई सरकार र त्यहांका एअरलायन्सहरु यो उडानका लागि सकारात्मक रहेको बताएका छन् । 

बैंककमा नेपाल समयसँग कुरा गर्दै उनले भने, “हामीले कुटनीतिक पहल शुरु गरेका छौं । उनीहरु बैंंकक– भैरहवा उडानका लागि सकारात्मक छन् । केही निश्चित प्रक्रिया पूरा भएपछि सम्झौता हुनेछ ।”

थाईल्याण्ड एअर र बैंकक एअरवेजसँग छलफल भईरहेको ढकालले बताए। 

लुम्बिनी भ्रमण वर्ष– २०७६ र नेपाल भ्रमण वर्ष २०२० लाई लक्षित गरी थाई नागरिकहरुलाई नेपाल पठाउन दूतावासले पहल गरिरहेको उनको भनाई छ ।  

नेपाल उड्यन प्राधिकरणका महानिर्देशक राजन पोखरेल पनि विमानस्थल सञ्चालनमा आएलगत्तै उडान शुरु गर्ने गरी ‘बढी आशा गरिएका’ श्रीलंका, थाईल्यान्ड, म्यानमार, चीन जस्ता बौद्ध धर्माबलम्बी धेरै भएका देशसंग छलफल भईरहेको छ । 

गौतमबुद्ध विमानस्थलमा उडान गर्ने अन्तराष्ट्रिय विमानलाई शुल्कमा केही छुट दिने सहित विशेष प्याकेजको कार्यक्रम समेत ल्याएको उनले बताए । 

https://www.nicasiabank.com/
थाइल्याण्डस्थित नेपाली राजदुत ढकाल थाईल्यान्डमा रहेका ९५ प्रतिशत बुद्धमार्गी लुम्बिनी भ्रमणमा जान ईच्छुक रहेको दाबी गर्छन् ।  

नेपाल र चीनबीच पनि भैरहवा सिधा उडानका लागि अन्तिम सम्झौताको तयारी भइरहेको छ । त्यस्तै जापान, चीन, श्रीलंका, भियतनाम, म्यानमार र कम्बोडिया लगायतका देशसँग पनि छलफल भइरहेको प्राधिकरणका महानिर्देशक राजन पोखरेल बताउँछन् । 
 
२०२३ साल फागुन १७ गते तत्कालीन युवराज वीरेन्द्रले उद्घाटन गरेको भैरहवा विमानघाट अहिले नाम परिवर्तन भई  गौतमबुद्ध अन्तराष्ट्रिय विमानस्थल भएको छ । त्यसबेला आन्तरिक उडानका लागि बनाइएको यो विमानस्थल विस्तार गरी अन्तर्राष्ट्रिय बनाउने कार्यको शिलान्यास तत्कालीन प्रधानमन्त्री सुशील कोइरालाले २०७१ माघ १ गते गरेका थिए । 

विमानस्थललाई अन्तराष्ट्रिय स्तरको बनाउने कार्यमा एसियाली विकास बैंकले ५८.५ प्रतिशत, साउदी अरबको साउदी फन्डबाट ३०.५ प्रतिशत र नागरिक उड्डयन प्राधिकरण (क्यान) ले ११ प्रतिशत लागत बेहोेर्ने गरी निर्माण कार्य शुरु भए पनि अहिले एसियाली विकास बैंकले ६२.६ प्रतिशत र क्यानको ३७.४ प्रतिशत लगानी भइरहेको छ । 

तत्कालीन युवराज वीरेन्द्रले उद्घाटन गरेको ५३ वर्षपछि ०७६ पुस १५ भित्र  गौतमबुद्ध विमानस्थलमा अन्तराष्ट्रिय उडान सञ्चालन गर्ने तयारी भइरहेको छ । 

हालसम्म विमानस्थलको करिब ८० प्रतिशत काम सम्पन्न भइसकेको विमानस्थल आयोजना प्रमुख प्रवेश अधिकारीले जानकारी दिए ।

विमानस्थल सञ्चालनमा आएसँगै यसको व्यवस्थापनको जिम्मा विदेशी कम्पनीलाई दिने तयारी स्वरुप सकारले (सरकार–सरकार) जी टु जी सम्झौता गर्ने कार्य अघि बढाउने तयारी गरेको छ ।

गौतमवुद्ध अन्तर्राष्ट्रिय विमानस्थलमा व्यवस्थापनको जिम्मेवारी लिनका लागि कतार, साउदी अरेबिया, जर्मनी लगायत देशका विमानस्थल व्यवस्थापकले चासो देखाएका छन् । 


 

प्रतिक्रिया