जानकी मन्दिरको पर्खाल भत्काएर सडक बनाउँदा तनाव

/assets/plugins/bower_components/fileman/Uploads/janaki_Mandir_Jagga_bibad.jpg

जनकपुरधाम- सडक विस्तारका लागि जानकी मन्दिरको पर्खाल भत्काइएपछि स्थानीय युवाहरु विरोधमा उत्रेका छन् । 

एसियाली विकास बैंकको सहयोगमा सञ्चालित एकीकृत शहरी विकास आयोजनाअन्तर्गत सडक विस्तार गर्न मन्दिरको जग्गा समेत प्रयोग भएपछि युवाहरुले विरोध गरेका हुन् ।

जनकपुरभित्र अन्य सडकहरु विस्तार भइसके पनि विवादका कारण जानकी मन्दिर पूर्वतर्फको सडक विस्तार हुन सकेको थिएन् । सडक विस्तारका लागि मन्दिरको जग्गा प्रयोग गरिए विश्वसम्पदा सूचीमा पर्ने सम्भावना न्यून हुने स्थानीयको भनाइ छ ।

जनकपुरधाम उपमहानगरपालिकाले मन्दिरको पूर्वतर्फको सडक ९ मिटर फराकिलो बनाउने मापदण्ड निर्धारण गरेको छ । यस अनुसार सडकको दुबैतर्फ ३÷३ फिट जग्गा अधिग्रहण गरिएको छ । 

मापदण्डअनुसार सडक निर्माण गर्दा मन्दिरको साबिकको जग्गा साँघुरिएको हो । स्थानीय युवाहरुकै विरोधका कारण करिब तीन महिनादेखि त्यहाँ सडक निर्माण हुन सकेको थिएन् । तर अहिले आएर उपमहानगरपालिकाले निर्माण सुरु गरेपछि फेरि विवाद चर्केको हो । 
https://www.nicasiabank.com/

धार्मिक, सांस्कृतिक र पूरातात्विक महत्वको जानकी मन्दिर परिसरको जग्गा कुनै पनि बहानामा अतिक्रमण हुन नदिइने स्थानीय युवा सरोज मिश्र बताउँछन् ।  “सडकको अर्कोतर्फको जग्गा दिन व्यापारीहरु तयार छन् भने त्यसैतर्फ सडक विस्तार गरियोस, नभए पूरानै मापदण्डको अनुसार सडक ठिकै छ,” मिश्र भन्छन् । 

अहिले मन्दिरको पूर्वतर्फको जग्गा मिचिए भोलि चारैतिरको जग्गा मिचिने भन्दै उनी चिन्ता व्यक्त गर्छन् । आफूहरुको मागको सुनुवाई नभइरहेकाले अब अदालत जाने तयारीमा रहेको उनले बताए ।

मन्दिरको जग्गा मिचेर सडक निर्माण गर्नु जानकी मन्दिरको अस्तित्वमाथि खेलवाडबाहेक अरु केही नहुने स्थानीय अमितकुमार पाठक बताउँछन् ।

सडक विस्तार गर्ने जानकी मन्दिरको पूर्वतर्फको पर्खाल भत्काएको उपमहानगरपालिकाले मापदण्डअनुसार सडक विस्तार गर्न दुवैतर्फ बराबर जग्गा अधिग्रहण गरिएको जनाएको छ ।

प्रतिक्रिया