व्यक्ति होइन नीतिको पछाडि लागौंः निधि

/assets/plugins/bower_components/fileman/Uploads/Nidhi_Jagaran_karyakram.jpg

जनकपुरधाम– नेपाली कांग्रेसका उपसभापति विमलेन्द्र निधिले पार्टीलाई सुदृढ बनाउन व्यक्ति नभएर नीतिको पछाडि लाग्न कार्यकर्ताहरुसँग आग्रह गरेका छन् ।  

नीतिलाई अवलम्बन गरेर अगाडी बढे पार्टीभित्र रहेको गुटउपगुटको समस्यासमेत नरहने निधिको तर्क छ ।

मंगलबारदेखि सुरु भएको दोस्रो चरणको राष्ट्रिय जागरण कार्यक्रमको जनकपुरमा उद्घाटन गर्दै उपसभापति निधिले नेपाली कांग्रेसभित्र गुटउपगुट र अन्तर्घातको ठूलो रोग रहेको बताए ।

‘पार्टीभित्र गुटउपगुट र अन्तर्घातको समस्या ठूलो रोगको रुपमा देखा परेको छ,’ निधिले भने, ‘गुटउपगुट अन्त्य गर्न नीति र अन्तर्घात अन्त्य गर्न पार्टीप्रति प्रतिवद्ध हुनुको विकल्प छैन ।’

अन्तर्घातकै कारण पछिल्लो निर्वाचनमा पार्टीलाई पराजय भोग्नुपरेको स्मरण गराउँदै उनले आगामी दिनमा कांग्रेसलाई बलियो बनाउन गुटउपगुट र अन्तर्घातको राजनीति त्याग्नुपर्ने बताए ।

नेता कार्यकर्ताबीच आपसी सम्वाद साथै मतदाता र युवाहरुसँग सम्पर्क, सम्वाद र सक्रियता बढाउनु दोस्रो चरणको राष्ट्रिय जागरण कार्यक्रमको प्रमुख उद्देश्य रहेको उनले बताए । 

पहिलो चरणको जागरण कार्यक्रम पूर्ण सफल रहेको दाबी गर्दै निधिले दोस्रो चरण अन्तर्गत सामाजिक विसंगति, सरकारको गलत क्रियाकलापलगायतका बारे आमनागरिकसँग सम्वाद गर्न कार्यकर्ताहरुलाई निर्देशनसमेत दिएका छन् ।

नेपाली कांग्रेसकै नेतृत्वमा संविधान जारी जारी भएको भन्दै उनले असोज ३ गते भव्यताका साथ संविधान दिवस मनाउन पनि आग्रह गरे । संविधानमा रहेका त्रुटिहरु संशोधन गर्न आफूहरु प्रतिवद्ध रहेको भन्दै निधिले संविधानको विरोध गर्नेहरु संघीयता पक्षधर हुनै नसक्ने बताए । 
https://www.nicasiabank.com/

‘उपेन्द्र यादव नेतृत्वको समाजवादी पार्टी सरकारमा छ, तर उसले संशोधनको कुरा गर्न सकेको छैन,’ उपसभापति निधिले भने,‘पार्टीकै नामबाट मधेश शब्द हटाइसकेकाले संविधानको विरोध गरेर मधेशी जनतालाई झुक्याउने काम गरिरहेको छ ।’ 

संविधान संशोधनको विरोध गर्नेमा सबैभन्दा अगाडि नेकपा रहेको उनको आरोप छ ।

सरकारले संविधानको भावनाविपरित विधेयकहरु ल्याउन लागेको भन्दै निधिले नागरिकतासम्बन्धी कानुनमा समेत सरकारको बेइमानी देखिएको आरोप लगाए । 

अंगीकृत वैवाहिक नागरिकतासम्बन्धी पुरानो व्यवस्थामा कुनै हेरफेर गरिए आफूहरुलाई मान्य नहुने बताउँदै उनले जन्मसिद्ध नागरिकका सन्तानले  वंशजको आधारमा नागरिकता पाउनुपर्ने बताए । 

प्रदेश क्षेत्र कार्यसमितिका सभापति शिवजी रायको सभापतित्वमा वृक्षारोपण गरी सम्पत्र भएको उद्घाटन कार्यक्रममा केन्द्रीय प्रतिनिधि हरेश महतो, शेख लालबाबु, कांग्रेसका धनुषा सभापति महेशशंकर गिरीलगायतका व्यक्तिहरुले सम्बोधन गरेका थिए ।

वीपी कोइरालाको १०६ औँ जन्मजयन्तीको अवसर पारेर सुरु भएको दोस्रो चरणको राष्ट्रिय जागरण कार्यक्रमअन्तर्गत कांग्रेसले हरेक प्रदेशसभा निर्वाचन क्षेत्रमा न्यूनतम १०६ वटा विरुवा रोपेको छ ।
 

प्रतिक्रिया