ट्रकको ठक्करबाट पुल क्षतिग्रस्त : पूर्व-पश्चिम राजमार्ग अवरुद्ध

/assets/plugins/bower_components/fileman/Uploads/post_images/2019, January/August/pool_damage_by_truck_hit.jpg

नवलपरासी- ट्रककाे ठक्करबाट पूर्वी नवलपरासीको अरुणखोला पुल क्षतिग्रस्त भएपछि पूर्व-पश्चिम राजमार्ग अवरुद्ध भएको छ। 

बुधबार बिहान ४ बजेको समयमा पूर्वबाट पश्चिमतर्फ जाँदै गरेको ना ६ ख ४७१ नम्बरको ट्रकले पुलको एकातर्फको भागमा ठक्कर दिँदा पुल चर्किएको छ । पूर्वतर्फको भागमा ट्रकले ठक्कर दिँदा त्यो भाग क्षतिग्रस्त भएको प्रहरीले जनाएको  छ। 

ट्रक पुलमा ठोक्किँदा पुलको एक स्थानमा क्षति पुगेर करीब दुई मिटर तल लच्किएकाले पुलबाट ठूला सवारीसाधान आवतजावत गर्न नसक्ने अवस्था भएको प्रहरी निरीक्षक अधिकारीले बताए ।

पुल चर्किएपछि सवारी आवागमन रोकिएको छ । नवलपुर प्रहरीका अनुसार पुल नै भत्किने जोखिम बढेपछि ठुला सवारीसाधन सञ्चालनमा रोक लगाइएको हो । साना हलुका सवारीसाधन भने चल्न दिइएको छ । 

प्रहरीले पूर्वबाट आउने सवारीलाई यात्रु उतारेर पूर्व नै फर्किने र पश्चिमबाट आएका सवारीलाई समेत यात्रु उतारेर पश्चिम नै फर्किने व्यवस्था गरिरहेको छ । प्रहरी निरीक्षक अधिकारीका अनुसार तत्काल पुल मर्मत हुनसक्ने सम्भावना कम भएकाले चितवन प्रहरी र बुटवल प्रहरीलाई खबर गरी वैकल्पिक बाटोको प्रयोग गरी सवारी सञ्चालनका लागि भनिएको छ ।

पुल चर्किएपछि सवारी आवागमन रोकिदा दशौं किलोमिटर लामो जाम भएको छ । गाडी पास कसरी गर्ने भन्ने अहिलेसम्म कुनै निक्र्यौल हुन नसकेको प्रहरीले जनाएको छ। वैकल्पिक बाटाेको खोजी भइराखेकाे जनाइएको  छ। 

बिहानैदेखि सडक अवरुद्ध भएपछि अहिले अरुणखोलामा सवारी रोकिएर लाम लागेको छ । साना सवारीलाई भने एकतर्फी रूपमा सञ्चालन गरिरहेको प्रहरी निरीक्षक अधिकारीले बताए । 




प्रतिक्रिया