जनावरलाई हानेको गोली लागेर युवकको मृत्यु 

/assets/plugins/bower_components/fileman/Uploads/post_images/2019, January/August/Bharuwa_banduk_ns.jpg

धनगढी- डोटीमा जङ्गली जनावर भगाउन हानेको गोली लागेर एक युवकको मृत्यु भएको छ ।

आदर्श गाउँपालिका–५ लामीखालका ५० वर्षे जङ्गे भुलले हानेको गोली लागेर राती करिव पौने ११ बजेतित १९ वर्षीया तपेश लुहारको ज्यान गएको हो ।

गोली लागेर उनको घटनास्थलमै ज्यान गएको जिल्ला प्रहरी कार्यालय डोटीका प्रहरी नायव उपरिक्षक लालबहादुर धामीले जानकारी दिए । तपेशको टाउकोमा गोली लागेको बुझिएको छ ।

स्थानीय सलामीढाडा सामुदायिक वन नजिकै गगने भाट र पुने भाटको खेतको किनारमा जङ्गे भुलले एक नाले भरुवा बन्दुक चलाउँदा गोली तपेशलाई लागेको जनाइएको छ ।

घटना भए लगतै इलाका प्रहरी चौकी आदर्शका प्रमुख प्रहरी नायव निरिक्षक धर्मानन्द जोशी नेतृत्वको टोलीले गोली चलाउने व्यक्ति र बन्दुक नियन्त्रणमा लिएको प्रहरीले जनाएको छ ।

घटनाको मुचुल्का तयारी र विस्तृत अनुसन्धानका लागि जिल्ला प्रहरी कार्यालय डोटीका प्रहरी निरिक्षक कर्णबहादुर बोहरा नेतृत्वको टोली आइतबार बिहानै घटनास्थलतर्फ गएको छ । 

मृतकको शव पोष्टमार्टमका लागि जिल्ला अस्पताल डोटीमा ल्याइने जिल्ला प्रहरी कार्यालय डोटी श्रोतले जनाएको छ ।  जंगली जनावर बदेलको सिकार गर्न बन्दुक चलाएको स्थानीयले बताएका छन् ।



प्रतिक्रिया