पाकिस्तानी पूर्वप्रधानमन्त्री नवाफ सरिफलाई जेल सजाय

Nawab_Sariff.jpg

काठमाडौं- पाकिस्तानका पूर्वप्रधानमन्त्री नवाज सरिफलाई भ्रष्टाचार अभियोगमा अदालतले शुक्रबार १० वर्षको जेल सजाय सुनाएको छ। 

बेलायती राजधानी लन्डनको एभेनफिल्ड हाउसस्थित उनको विलासी फ्ल्याटसँग जोडिएको भ्रष्टाचार अभियोगमा सरिफलाई उक्त सजायँ सुनाइएको हो । ‘नेसनल एकान्टिबिलिटी ब्युरो’(एनएबी) अदालतले शृंखलाबद्ध ढिलाइपछि १० वर्षे कारावास सजायँको फैसला दिएको हो। 

उनी पत्नी कुलसुम नवाजसहित हाल लन्डनमा छन्, जहाँ कुलसुमको घाँटीको क्यान्सरको उपचार चलिरहेको छ । अदालतले उनलाई राजनीतिक रूपबाट प्रेरित आरोपहरूमा सुनुवाइका लागि उपस्थित हुन आदेश पनि दिएको छ। 

उनकी छोरी मरियमलाई पनि अदालतले सातवर्षे कारावासको सजायँ सुनाएको छ । अदालतले फरार सूचीमा राखेका उनका ज्वाईं अवकाशप्राप्त क्याप्टेन सफ्दार तथा दुई छोराहरू हसन र हुसेनलाई पनि उक्त प्रकरणमा जोडिएको छ। 

छोरी मरियमलाई आमनिर्वाचनमा उम्मेदवार बन्न यसअघि अयोग्य घोषित गरिएको थियो । पूर्वप्रधानमन्त्री सरिफले आफूमाथि लगाइएका अभियोग अस्वीकार गर्दै आएका छन्। 

२८ जुलाई २०१७ मा अदालतले प्रधानमन्त्री बन्न अयोग्य घोषणा गरेपछि सरिफले पदबाट राजिनामा दिएका थिए । सत्तामा रहँदा सेनासँग ठूलो मतभेदका कारण उनले बारम्बार पदच्युत हुनु परेको थियो । सन् १९९९ मा उनलाई सत्ताबाट हटाउन सेनाले रक्तपातविहीन विद्रोह नै गरेको थियो। 

एक साताअघि लन्डनमा आयोजना गरेको पत्रकार सम्मेलनमा सरिफले पत्नीको उपचार सकिएपछि पाकिस्तान फर्किने बताएका थिए । अदालतले दोषि ठहर गरे या नगरे पनि आफू स्वदेश फर्किने उनको भनाइ थियो। 

जियो टेलिभिजनका अनुसार अदालती फैसलापछि अशान्ति फैलिने शंकामा पाकिस्तानी राजधानी शहर इस्लामावादमा सुरक्षा व्यवस्था कडा बनाइएको छ । एक ठाउँमा जम्मा भएर बस्न तथा सभा–जुलुस गर्न नपाइने घोषणा प्रशासनले गरेको छ। - एजेन्सी



प्रतिक्रिया