रगतको होली नखेल्न कांग्रेसको आग्रह

/assets/plugins/bower_components/fileman/Uploads/post_images/2019, January/July/Bishwa_P_Sharma.jpg

काठमाडौं- प्रमुख प्रतिपक्षी दल नेपाली कांग्रेसले सरकार र विप्लव नेतृत्वको समूहलाई संयम हुन आग्रह गरेको छ।

प्रवक्ता विश्वप्रकाश शर्माले बुधबार साँझ एक विज्ञप्ती जारी गर्दै दुबै पक्षले वार्ताको प्रयास गर्न र वार्ताबाटै समाधान खोज्न आग्रह गरेका हुन्।

विज्ञप्तीमा प्रवक्ता शर्माले दुबै पक्षलाई सचेत गराउँदै रगतको होली नखेल्न आग्रह गरेका छन्।

प्रवक्ता शर्माले १० वर्ष लामो तत्कालीन माओवादी हिंसा पनि वार्ताकै माध्यमबाट अन्त्य भएको स्मरण गर्दै हिंसाले कुनै पनि निष्कर्षमा पुग्न नसकिने भन्दै सरकारलाई बार्ताका लागि पहल गर्न र विप्लव समूहलाई वार्ताका लागि तयार हुन आग्रह गरेका छन्।

विज्ञप्तीमा कांग्रेसले यसअघि सर्लाही घटनाको संसदीय छानबिनको माग गर्दै आएकोमा अर्को घटना भएको भन्दै यसलाई गम्भीरताका साथ लिएको जनाइएको छ।

बुधबार भोजपुरमा एक प्रहरी जवान र एक विप्लव समूहका कार्यकर्ता मारिएको घटनाको पनि सत्यतथ्य जानकारी सार्वजनिक गर्न सरकारसँग माग गरिएको छ।

यस्तो छ विज्ञप्ती

असार २५, २०७६

 

सत्तारूढ र विद्रोही दुवै नेकपालाई संयुक्त चेतावनी र अपिल 
   ``शान्तिपुर्ण समाधानको विकल्प रोज´´ !
https://www.nicasiabank.com/

१, भोजपुरमा आज रास्ट्रसेवक प्रहरी जवान सन्जिव राईले कर्तव्य पालना क्रममा जीवन गुमाएका छन् भने विद्रोही माओवादी समुहका कार्यकर्ता निरकुमार राइपनी घटनामा मारिएका छन्। नेपाली कांग्रेसले यो दु:खद घटनालाई 
गम्भीरतापूर्वक लिएको छ।

२,काठमाडौमा बम बिस्फोटबाट जनधनको क्षति, सर्लाहीको `फेक इन्काउन्टर´ र पुर्वी पहाडमा `फेक इन्काउन्टर´को पहिलो घटना पश्चात् आज दुई युवाको जीवन समाप्तिको घटनाले अब विषयलाई बिशेष गम्भीर ढंगले लिन र समाधानको खोजी गर्न पर्याप्त दबाब सम्बन्धित दुवै पक्षलाई बढाएको हुनुपर्छ भन्ने अपेक्षा नेपाली कांग्रेसले गरेको छ।

३, दशक लामो हिंसात्मक द्वन्द्वबाट शान्ति र समृद्धिको नवीन अध्यायमा प्रवेश गरेको मुलुक रक्तपातका दृश्यहरु पुन सामना गर्न किमार्थ तयार छैन। नेपाली कांग्रेस विद्रोही नेकपाका नेता विप्लवलाई हत्या-हिंसाको मार्ग तत्काल परित्याग गरेर शान्तिपूर्ण राजनीतिमा आउन पुन अपिल गर्दछ। प्रचण्ड नेतृत्वको हिंसात्मक विद्रोहले अन्तत त्यो मार्ग परित्याग गरेर मात्रै समाधानमा योगदान गर्न सकेको तथ्य हामी स्मरण गराउन चाहन्छौं।

४, संविधानलाई अस्विकार गरेर गतिविधि गरिरहेका सबै खाले समुहलाई वार्ता मार्फत विश्वासमा लिने कर्तव्य सरकारको हो। हिजोको माओवादी विद्रोहलाई बल प्रयोगबाट समाधान गर्ने नीति परित्याग गरेर अन्तत वार्ताबाट रुपान्तरित गरेको कांग्रेस नेतृत्वको सफल अनुभवको स्मृति वर्तमान सरकारले गर्नु यतिबेला सान्दर्भिक हुनेछ ।

५, विप्लवको हिंसा झैं सरकारको निषेधको रणनीतिपनि गलत छ। दर्तानै नरहेको दलमाथी प्रतिबन्धको घोषणाले मुलुकमा समाधान होइन तनाव सृजना गर्न योगदान पुर्‍यायो। सो घोषणा पश्चात् समस्या समाधानको संकेत देखिएन बरु चर्किन त्यसले नकारात्मक ढंगले योगदान गर्‍यो। नेपाली कांग्रेस निषेधको नीति त्याग गरेर संवाद मार्फत समाधान पहिल्याउन प्रधानमन्त्रीको शासकीय योग्यता देशले खोजेको उहाँलाई स्पस्ट गर्न चाहन्छ।

६, जनताको बलिदानिपुर्ण संघर्षहरुबाट प्राप्त उपलब्धिको रक्षा गर्दै मुलुकको समग्र अग्रगतिका लागि अघि बढ्नु हामी सबैको साझा कर्तव्य हो। सत्तारूढ र विद्रोही दुवै कम्युनिस्ट पार्टीलाई एकथरीले क्रान्तिका नाममा र अर्कोले शान्ति सुरक्षा स्थापनाको सरकारी दायित्वका नाममा जनताको रगतको होलि नखेल्न हामी चेतावनी दिन चाहन्छौं । आजका उपलब्धिहरुको जगेर्नाका लागि गम्भीर बन्न हामी दुवै नेकपालाई अपिल गर्दछौं।

७, सर्लाही घटनाको संसदीय छानबिनको माग गर्दै आएको नेपाली कांग्रेस भोजपुरको आजको घटनाको वास्तविक विवरण तत्काल सार्वजनिक गर्न सरकार समक्ष माग गर्दछ !

जय नेपाल 
विश्वप्रकाश शर्मा 
  प्रवक्ता 

प्रतिक्रिया