जनकपुरकी उपमेयरले दिइन् एक्सन कमिटीको संयोजक बाट राजीनामा

/assets/plugins/bower_components/fileman/Uploads/post_images/2019, January/June/janakpur_asst_mayor.jpg

जनकपुरधाम – जनकपुरधाम उपमहानगरपालिकाकी उपमेयर रीताकुमारी मिश्रले विभित्र उपसमितको संयोजक पदबाट राजीनामा दिएकी छिन्। आफूले पाएको तीन समितिको संयोजक पदमा नबस्ने भन्दै मिश्रले उपमहानगरपाकिालका मेयर लालकिशोर साहसमक्ष शुक्रबार राजीनामा दिएकी हुन्।

उपमहानगरपालिकाले उपमेयर मिश्रलाई एक्सन कमिटी, लामखुट्टे नियन्त्रण र रंग पेन्ट वितरण कमिटीको संयोजक बनाएको थियो। तीनवटै कमिटीको संयोजक रहेपनि आफुलाई जानकारी नै नदिइ काम भइरहेको भन्दै संयोजक पदबाट राजीनामा दिएको उपमेयर मिश्रले बताइन्।

जनकपुरमा सडक विस्तारका लागि घरटहरा भत्काउन तथा तोडफोड गर्न उपमहानगरपालिकाले मिश्रको संयोजकत्वमा कमिटी बनाएको थियो। विगतमा भएको तोडफोडबारे आफुलाई जानकारी गराइएपनि दुई दिनअघि केही घरहरुको पर्खाल तोडफोड गरिएको बारे जानकारी नगराइएको मिश्रले बताइन्।

पछिल्लो पटक जनकपुरधाम उपमहानगरपालिका–४ का केही घरहरुको पर्खाल भत्काइएको छ, तर यसबारे आफुलाई कुनै जानकारी नगराइएपछि संयोजक पदबाट राजीनामा दिएको उनले बताइन्। एक्सन कमिटीको संयोजक रहेपनि आफूलाई जानकारी नै नगराई तोडफोड हुँदा भविष्यमा अदालतमा मुद्दा परे आफु फस्ने भएकोले पद त्याग गरेको उपमेयर मिश्रले बताइन्।

यसैगरी नगर क्षेत्रमा लामखुट्टे नियन्त्रण गर्न नाला तथा ढलहरुमा मोबिल छर्किने काम भइरहेपनि यसबारे आफुलाई केही जानकारी नरहेको उनले बताइन्। ‘नगर क्षेत्रको विभिन्न ठाउँमा मोबिल छर्केको देख्छु,’ नेपाल समयसँग कुरा गर्दै मिश्रले भनिन्, ‘कति मोबिल वा कति औषधि कुन ठाउँमा छर्किने काम भएको छ मलाई जानकारी छैन्।’ भविष्यमा यस शिर्षकमा भ्रष्टाचार भए आफु फस्ने भएकोले राजीनामा गरेको उनको भनाइ छ।

सडक विस्तारका क्रममा घरहरु तोडफोड हुँदा उपमहानगरपालिकाले रंगरोगनका लागि निःशुल्क उपलब्ध गराउने गरेको छ। कमिटीको संयोजक रहेपनि कसलाई कति रंग वितरण गरियो यसबारे आफु जानकार नरहेको मिश्रले बताइन्। भोलि अनियमितताको कुरा उठे संयोजकको हैसियतले आफु फस्ने निश्चित रहेको भन्दै उपमेयर मिश्रले जानकारी बिनै सबै काम हुन थालेपछि संयोजक पदबाट राजीनामा दिएको उल्लेख गरिन्।

उपमहानगरपालिकाका प्रमुख लालकिशोर साह, प्रमुख प्रशासकीय अधिकृत सीता परियार र कमिटीमा रहेका वडाअध्यक्षहरुको सिफारिसमा ती सबै काम भइरहेको उनको आरोप छ।




प्रतिक्रिया