अपरेसन क्लिन काठमाडौं : पुराना फाइल खोतल्दै प्रहरी

/assets/plugins/bower_components/fileman/Uploads/post_images/2019, January/May/nepal_police01.jpg

काठमाडौं- प्रहरी सक्रियता बढेसँगै उपत्यकामा अघिल्ला वर्षको तुलनामा संगठित अपराध, अपहरण, गुन्डागर्दी, फिरौतीलगायत घटनामा केही कमी आएको थियो ।

नेकपा विप्लव समूहले एनसेल कार्यालय र वैदेशिक रोजगार व्यवसायी संघका अध्यक्ष निवासमा बम विस्फोट गरायो । शान्ति व्यवस्था खलबल्याउने शृंखलाबद्ध आक्रमणले उपत्यका असुरक्षित बनेपछि सरकारले विप्लवका गतिविधिमाथि प्रतिबन्ध लगायो। 

वैदेशिक रोजगारीमा जाने युवा ठगिन्थे भने बिचौलियाले सेवाग्राहीलाई सजिलै काम गर्न दिन अवस्था थिएन । बिचौलियाको कब्जामा थियो वैदेशिक रोजगार विभाग । सेवाग्राहीले प्रहरीसँग गुहार मागेपछि प्रहरी सक्रियतामा बिचौलियाको सञ्जाल ध्वस्त पार्‍यो । 

यी गैरकानुनी गतिविधि त्यत्तिकै नियन्त्रणमा आएका होइनन् । प्रहरीको 'अपरेसन क्लिन काठमाडौं' अभियान सुरु भएपछि संगठित अपराध, अपहरण, गुन्डागर्दी, फिरौती आदि गतिविधि न्यून भएका हुन्। 

अभियानमा एक हजार बढी अनुसन्धान अधिकृत परिचालित छन् । महानगरीय अपराध अनुसन्धानका एसएसपी सहकुल थापाको नेतृत्वमा एसपी केदार ढकाल, एसपी सोमेन्द्रसिंह राठौर र डिएसपी रुगम कुँवरले उपत्यकामा हुने गैरकानुनी क्रियाकलापको सूक्ष्म निगरानीमा परिचालित छन्।

त्यस्तै परिसरले एसएसपी उत्तम सुवेदी एसपी अशोक सिंह तथा डिएसपी होविन्द्र बोगटी नेतृत्वमा विभिन्न ६ टोलीलाई गैरकानुनी क्रियाकलाप नियन्त्रण गर्न खटाएको छ ।

महाशाखा र परिसरको सक्रियतापछि संगठित अपराध, विस्फोट, गुन्डागर्दी फिरौतीलगायत घटनामा आंशिक कमी आएको छ । साइबर क्राइम तथा मानव बेचबिखनका घटना वृद्धि हुँदा प्रहरीका लागि अनुसन्धान थप चुनौतीपूर्ण बन्दै गएको छ । उपत्यकामा बढ्दो जनसंख्यासँगै आपराधिक घटना पनि बढेका छन् । साथै आपराधिक कार्यमा प्रविधि प्रयोग हुन थालेपछि प्रहरी अनुसन्धान चुनौतीपूर्ण बन्दै गएको हो ।
 
काठमाडौंको सुरक्षा चुनौती नियन्त्रण गर्न प्रहरी मुख्यालयले अनुसन्धान अपरेसन तथा गुन्डागर्दी नियन्त्रणमा विशेष दख्खल भएका दुई वरिष्ठ प्रहरी उपरीक्षकलाई अपराध अनुसन्धान महाशाखा र महानगरीय प्रहरी परिसर काठमाडौंको जिम्मेवारीसहित सरुवा गरेको छ । 
https://www.nicasiabank.com/

के हो क्लिन काठमाडौं अभियान ?

अपराध अनुसन्धान महाशाखा प्रमुख एसएसपी सहकुल थापा भन्छन, 'संगठित अपराध र गुन्डागर्दी नियन्त्रण तथा उपत्यकामा हुने अश्लील त्रियाकलाप नियन्त्रण गर्ने अभियान हो यो ।' उनका अनुसार यसको उदेश्य उपत्यकाको शान्तिसुरक्षा थप सुदृढ बनाउनु हो । 

थापाले काठमाडौंमा हुने अपराध, गुन्डागर्दी, फिरौती तथा व्यापारी धम्क्याउने क्रम केही घटेको दाबी गरे ।  प्रहरी सक्रियताले केही गुन्डा जेल परेका छन् भने केहीले देश छाडेर बिदेसिएका छन् । तर तिनीहरुले कुनै पनि बेला आफ्नो सक्रियता बढाउन सक्ने उनको भनाइ छ । उनले भने, 'काठमाडौंमा कुनै अप्रिय घटना नहोस् भनेर हामीले संगठित अपराध र गुन्डाको निगरानी र विगतमा भएका घटनाको अध्ययनसमेत सुरु गरेका छौ ।'
 
महानगरीय प्रहरी परिसर काठमाडौंले पनि उपत्यकाको शान्तिसुरक्षा थप मजबुत बनाउन प्रहरी सक्रियता बढाएको छ । परिसरले काठमाडौंका विशेष ६७ स्थानमा स्थायी पिकेट बनाएको छ भने कुनै अप्रिय घटना सूचना पाए तत्काल घटनास्थल पुग्ने गरी ८६ वटा क्विक रेस्पेन्स टिम विभिन्न स्थानमा तयारी अवस्थामा राखेको जनाएको छ । सूचना संकलनका लागि विगतमा भन्दा सादा पोसाकका प्रहरी संख्या वृद्धि गरिएको छ । आवश्यकताअनुसार पैदल गस्ती र साइकल गस्तीसमेत बढाइएको परिसरले जनाएको छ ।

परिसरका एसपी अशोक सिंहले सुरक्षा व्यवस्था सुदृढ बनाउन प्रहरी परिचालन बढाइएको बताए । उनले भने, 'सामाजिक विकृतिले हुनसक्ने घटनामाथि प्रोएक्टिभ पुलिसिङ अवधारणाअनुसार परिसर अगाडि बढेको छ ।'

अप्रिय घटना हुन नदिन मातहतका सबै निकायलाई निर्देशन दिएको सिंहले बताए । आपराधिक क्रियाकलाप र लागूऔषध कारोबार बढी हुने स्थानमा सूक्ष्म निगरानी बढाएको उनले जानकारी दिए । यस्तै परिसरले ठमेल, नयाँबसपार्क, कलंकीलगायत ठाउँमा स्टिङ अपरेसन सञ्चालन गरेको छ।परिसरको सक्रियताले दैनिक सय जनाभन्दा बढी पक्राउ पर्न थालेका छन् । पक्राउ पर्नेहरु सरकारी कर्मचारी र गैरसरकारी व्यक्ति पनि छन् ।
 
संगठित अपराधी र गुन्डाहरु केही प्रहरी नियन्त्रणमा आएका छन् भने केही फरार छन् । तर गुन्डाहरुको सन्जाल राजनीतिक नेतासम्म फैलिएकाले कुनै पनि बेला उनीहरुको सक्रियता बढ्न सक्ने प्रहरी अनुमान छ । त्यसका लागी महाशाखा र परिसरले थप निगरानी बढाएको छ ।   

प्रतिक्रिया