बैशाख ९ मा एकता टुङ्ग्याउन नेकपाका शीर्ष नेता गोप्य छलफलमा

/assets/plugins/bower_components/fileman/Uploads/post_images/April/SACHIWALAYA_NEKAPA.jpg

काठमाडौं- बैशाख ९ गते कम्युनिस्ट दिवसको अवसर पारेर पार्टी एकता टुङ्ग्याउने तयारी गरेका नेकपाका शीर्ष नेताहरु गोप्य छलफलमा जुटेका छन् ।

बैशाख ९ गते एकता प्रक्रियाका सबै काम सक्ने सैद्धान्तिक सहमति गरेका शीर्ष चार नेताहरु आइतबार पुनः गोप्य छलफलमा बस्न लागेका हुन् ।

अध्यक्षद्वय केपीशर्मा ओली र पुष्पकमल दाहाल प्रचण्ड, वरिष्ठ नेता माधवकुमार नेपाल र महासचिव विष्णु पौडेल गोप्य छलफलमा जुटेका हुन् । बिहान ९ बजेपछि हुने छलफलले जिल्ला अध्यक्ष र सचिवहरूको सूची टुंग्याउने स्रोतको दाबी छ ।
 
शीर्ष नेताहरु शुक्रबार र शनिबार लगातार छलफलमा जुटेका थिए । आजको बैठकले ती छलफलको परिणाम निकाल्ने नेकपका प्रवक्ता नारायणकाजी श्रेष्ठले बताए। उनका अनुसार शीर्ष नेताबीचको छलफलले सकारात्मक निष्कर्ष निकालेको अवस्थामा तत्कालै केन्द्रीय सचिवालय बैठक बस्ने सम्भावना छ ।

घनिभूत छलफलमा जुटेका शीर्ष चार नेताबीच शुक्रबार बालुवाटारमा लामो छलफल भएको थियो । अन्तिम गृहकार्यका लागि सिन्धुपाल्चोकको सुकुटेबाट फर्किएलगत्तै बालुवाटार पुगेर अध्यक्ष प्रचण्ड छलफलमा सहभागी भएका थिए । 

बिहीबार अध्यक्ष ओली र प्रचण्डले वरिष्ठ नेता नेपाललाई मनाउन एकता प्रक्रियाका मापदण्डमा केन्द्रित रहेर छलफल गरेका थिए । शनिबार पनि नेताहरुले विभिन्न चरणमा छलफल गरेका थिए । 

विशेषगरी पूर्वएमाले समूहमा एकता टुंग्याउने मापदण्डबारे अध्यक्ष ओली र नेपालबीच समझदारी जुटेको थिएन । नेपाल साबिक कमिटीमा रहेकामध्येबाट वरिष्ठलाई अध्यक्ष र सचिव बनाउनुपर्ने अडानमा छन् । पछिल्ला छलफलपछि भने अध्यक्ष ओली सबै जिल्लामा एउटै मापदण्ड लागू हुन नसके पनि नेपाल समूहलाई पनि सम्मानजनक स्थानका साथ समेटेर प्रस्ताव टुंग्याउने निष्कर्षमा पुगेका छन् ।

लामो समयदेखि एकता प्रक्रियाको बाँकी काम अल्झिँदा सरकार सञ्चालनमा समेत सकारात्मक प्रभाव नदेखिएपछि शीर्ष नेताहरूले पार्टी स्थापना दिवसमै टुंग्याउने गरी लगातार निर्णायक गृहकार्य गर्दै आएका छन् । पार्टी एकता नटुङ्गिदा जिम्मेवारी बिहिन भएका नेकपाका करिब ५ देखि ७ लाख कार्यकर्ता निराश बन्न थालेका छन् । 
 



प्रतिक्रिया