कोइरालाको गढमा देउवाको दौड

/assets/plugins/bower_components/fileman/Uploads/post_images/february/2019, March/Deuwa_Biratnagar_Airport.jpg

इटहरी- २००७ सालको क्रान्तिको बिगुल फुक्ने र कोइरालाहरूको 'स्ट्रङहोल्ड' मानिने मोरङमा पछिल्ला महिनामा देउवाको आगमन बढ्दो देखिएको छ ।

१४ औँ महाधिवेशन नजिकिएसँगै देउवाको शक्ति प्रदर्शन पनि मोरङ र खासगरी विराटनगरमा बढ्दो क्रममा देखिएको छ । यसको उदाहरण लिन फागुन २३ गते बिहीबारको घटना हेरे पुग्छ । उक्त दिन शेरबहादुर देउवा कुनै राजनीतिक कार्यक्रममा आएका थिएनन् । न त कुनै विजय उत्सव मनाउनै आएका थिए । विराटनगरको न्यु सृष्टि दैनिकको वार्षिकउत्सव समारोहमा आएका थिए देउवा ।  तर जसै देउता विराटनगर विमानस्थलमा ओर्ले, उनको स्वागतमा सयौं कार्यकर्ता आए ।

मोरङ कांग्रेसका एक नेताका अनुसार देउवाको पक्षमा मोरङमा जनमत छ भन्ने देखाउन दर्जन बढी गाडी 'रिजर्भ' गरेरै कार्यकर्ता विमानस्थल पुगेका थिए । यसअगाडि कहिल्यै यस्तो जमातमा स्वागत नगर्ने कार्यकर्ताहरू उतार्न मोरङका देउवा क्याम्पसका नेताहरू  रमेशजंग रायमाझी र अमृत अर्यालले अगुवाइ गरेको कोइराला पक्षीय एक नेताले बताए ।

केन्द्रीय सदस्य अर्याल र राष्ट्रियसभा सदस्य तथा स्वर्गीय कांग्रेस नेता खुमबहादुर खड्काका विश्वास पात्र मानिने  र हाल देउवा क्याम्पसका मोरङ बलिया नेता रायमाझीले कोइराला क्याम्पलाई सन्देश दिन यस्तो गरेको कांग्रेस नेताहरू बताउँछन् ।  अरू बेला प्रदेश १ का कोसी कोरिडोरका कार्यक्रममा आउँदा सामान्य रूपमा विराटनगर विमानस्थलबाट आउने देउवालाई 'रोयल' वेल्कम गर्नुमा महाधिवेसनको सरगर्मी भएको कांग्रेस नेताहरू बताउँछन् ।


तीन कोइराला एक भएपछि मोरङ आगमन बढाउँदै देउवा

१३ औं महाधिवेशनमा महामन्त्रीको दाबेदार थिए कोइरालात्रय– सुजाता कोइराला, शशाङ्क कोइराला र शेखर कोइराला । तर महामन्त्री भए शशाङ्क । कोइरालात्रय मिल्नुपर्छ भन्ने पार्टीबाट दबाब आएपछि कोइरालाहरू एक ठाउँमा आएको औपचारिक दिन बन्यो २०७५  साउन ४ गते । काठमाडांैको टोखास्थित शशाङ्क निवासमा तीन कोइरालाले भेट गरे । मिडियामा 'लन्चमिटिङ' भनिएको उक्त भेलालाई कोइराला एक भएको सन्देश दिएको उनीहरूले सार्वजनिक अभिव्यक्ति दिएका थिए । साउन ४ मा एकजुट भएको औपचारिक सन्देश दिएका कोइरालात्रयले एक महिनापछि भदौ ८ गते पुनःशशाङ्क निवासमै भेटे कोइरालात्रयले ।

उपत्यकामा भेटेको तीन महिनापछि विराटनगरमा आएर एकै मालामा बाँधिए कोइरालात्रय । गत मङ्सिर ३ गते गिरिजाप्रसाद कोइरालाको स्मृतिमा बनेको जिपी कोइराला फाउन्डेसनको कार्यक्रमको अवसरमा कोइरालात्रयले एकै माला लगाएका थिए । कार्यक्रममा बोल्दै पार्टी महामन्त्री शशाङ्क कोइरालाले शेखर कोइरालाले नेतृत्व लिन सक्ने बताए । कोइराला परिवारका सदस्य तथा पार्टी महामन्त्री शशाङ्क कोइरालामात्रै हैन, देउवानिकट मानिएका मोरङ सभापति डिकबहादुर लिम्बुले पनि कोइराला परिवारमा नेतृत्व हस्तान्तरण हुनुपर्ने धारणा राखे ।

यसरी विराटनगरमा तीन कोइरालाले एकै माला लाएको र आफ्नै क्याम्पसका सभापतिले भाबी नेतृत्व कोइरालामा जानुपर्ने सार्वजनिक अभिव्यक्ति दिएकै भोलिपल्ट देउवा मोरङमा आए ।  मङ्सिर ४ गते मंगलबार विराटनगर आर्लेका देउवा  राजनीतिक प्रतिवेदनका लागि प्रदेशस्तरीय सुझाव सङ्कलनका लागि आयोजित प्रदेश भेलामा सहभागी भएका थिए । विराटनगरको वीरेन्द्र सभागृहमा  शेखर कोइरालासँगै मञ्च सेयर गरेका देउवाले कोइरालासँग संवाद गरेनन् ।

वीरेन्द्र सभागृहको कार्यक्रमको ठिक अर्को महिना पनि देउवा पुनः मोरङ आए ।  पुस २१ र २२ गतेको प्रदेश १ स्तरीय पार्टी प्रशिक्षण कार्यक्रमका लागि २१ गते उत्तरी मोरङको लेटाङ आए देउवा । उक्त दिन सयौं कार्यकर्ताहरू उतारेर देउवाको 'भव्य' स्वागत गर्न देउवा क्याम्पसका नेताहरू लागिपरेको मोरङ कांग्रेसका नेताहरू बताउँछन् ।

देउवाका लागि टाउको दुखाइ : पुरञ्जन आचार्य

यसरी पछिल्ला ४ महिनामा ३  पटक मोरङ आएका छन् सभापति देउवा । मङ्सिर ४ गते सामान्य रूपमा आएका उनलाई पुस २१ र फागुन २३ मा आउँदा भने स्वागत गर्ने कार्यकर्ताको संख्या बढ्दो क्रममा छ । यसलाई कतिपयले देउवाको शक्ति प्रदर्शनको रूपमा व्याख्या गर्न थालेका छन् ।

राजनीतिक टिप्पणीकार पुरञ्जन आचार्यका अनुसार शेखर कोइरालाको सक्रियताले देउवाको टाउको दुखाइ भएको छ । 'मोरङ कांग्रेस पूर्वी तराईको सबैभन्दा बलियो गढ हो र यो शेखर कोइरालाको जिल्ला पनि हो', आचार्यले पत्रकारसँग भने, 'आफ्नो सभापतिका लागि कोइराला थ्रेट भएको महसुस गरेका छन् देउवाले । त्यही भएर मोरङमा सक्रियता बढाएका हुन सक्छन् ।'




प्रतिक्रिया