मुख्यमन्त्री भन्छन्- 'कसैले चाहदैमा मैथिली सकिदैन'

/assets/plugins/bower_components/fileman/Uploads/post_images/february/2019, March/lalbanu_raut_maithili.jpg

जनकपुरधाम- प्रदेश २ का मुख्यमन्त्री लालबाबु राउतले लामो इतिहास बोकेको मैथिली भाषालाई कसैले समाप्त पार्न नसक्ने स्पष्ट पारेका छन् । हजारौं वर्ष पुरानो इतिहास रहेको मैथिली भाषालाई ओझेलमा पार्ने कसैले सोच्नपनि नहुने उनको भनाइ छ ।

मैथिली विकास कोषले आयोजना गरेको जनकपुर साहित्य–कला तथा अन्तर्राष्ट्रिय नाट्य महोत्सवको समापन कार्यक्रममा बिहिबार बोल्दै मुख्यमन्त्री राउतले नेपालकै सबैभन्दा बढी बोलिने दोस्रो भाषा प्रदेश २ को पहिलो भाषा हुनेतर्फ संकेतसमेत गरे ।

प्रदेश २ को कामकाजी भाषाबारे विवाद चलिरहेको बेला मुख्यमन्त्री राउतले भने,‘प्रदेश २ मा मैथिली भाषासँग अन्याय हुन्छ भनेर नसोच्नुस । यसको आफ्नै इतिहास छ, समृद्ध र परिकृष्ट भाषाको रुपमा मैले मैथिलीलाई बुझेको छु ।’

मैथिलीलगायत प्रदेश २ मा बोलिने सबै मातृभाषालाई सम्मान दिनुपर्ने भन्दै मुख्यमन्त्री राउतले सम्पर्क भाषाको रुपमा सबैले ध्यान पु¥याउनुपर्ने उल्लेख गरे । ‘मैथिली बोल्नेले भोजपुरी बोल्न समस्या आउन सक्दछ, भोजपुरी बोल्नेलाई मैथिलीको,’ राउतले भने,‘यस समस्यातर्फ हामीसबैले मनन गर्नुपर्ने जरुरी छ ।’ 

यसअघि राज्यसत्ताको विभेदका कारण मैथिली पछाडी परेको भन्दै राउतले मैथिलीलगायत सम्पूर्ण मातृभाषालाई माथि उकास्ने जिम्मेवारी अब प्रदेश सरकारको काँधमा आएको स्पष्ट पारे । ‘विगतमा सत्ता सञ्चालन गरेकाहरुलाई आरोप लगाएर हामी उम्किन सक्दैनौं,’ राउतले भने,‘भाषा, कलासंस्कृति संवद्र्धन गर्ने जिम्मेवारी हामीमाथी आएको छ । र, यो जिम्मेवारी हामी पुरा गरेर छोड्छौं ।’

सरकार कार्यान्वयनमा आएको एक वर्ष बितिसक्दासमेत प्रदेशको नामाकरण, राजधानी र भाषासम्बन्धी प्रस्ताव प्रदेश सरकारले ल्याउन नसकेको राउतअघि बोलेका वक्ताहरुको जबाफ फर्काउँदै उनले आफूहरु चाँडै यो प्रस्ताव ल्याउने तयारीमा रहेको जानकारीसमेत गराए ।

कोषका अध्यक्ष जीवनाथ चौधरीले विद्यालय तहसम्म न्यूनतम एक विषय मातृभाषामा अध्ययन अध्यापन गराउने व्यवस्था गर्न मुख्यमन्त्री राउतको ध्यानाकर्षण गराएका थिए । यसैगरी सबैभन्दा बढी बोलिने भाषा रहेकोले प्रदेशको कामकाजी भाषाको रुपमा मान्यता दिँदै जनकपुमा मिथिला प्रज्ञा प्रतिष्ठानको स्थापना गर्नतर्फ प्रदेश सरकारले पहल गर्नुपर्ने चौधरीको भनाइ थियोे ।

१८ फागुनदेखि ६ दिनसम्म चलेको महोत्सवमा भाषा, साहित्य, कलासंस्कृति, आमसञ्चार, नाट्य क्षेत्रलगायतका विषयमा गम्भीर छलफल चलेको थियो । यसैगरी महोत्सवमा भारत, अफगानिस्तान, कर्णाली प्रदेश र जनकपुरका कलाकारहरुले विभित्र सातवटा नाटक मञ्चन गरेका थिए ।

महोत्सवमा वरिष्ठ साहित्यकार डा.राजेन्द्र विमल, भाषाविद् डा.रामावतार यादव, डा.संजीव उप्रेती, डा.बीरेन्द्र पाण्डेयलगायतका व्यक्तिहरुले आ–आफ्ना धारणाहरु व्यक्त गरेका थिए ।




प्रतिक्रिया