काठमाडौं- राष्ट्रिय स्वतन्त्र पार्टी (रास्वपा)को केन्द्रीय समिति र संसदीय दलको बैठक आज आइतबार बस्दैछ। सरकारमा रहने कि नरहने भनेर निर्णय गर्न बैठक बस्न लागेको हो।
शनिबार राति अबेरसम्म बसेको बैठक बिनानिष्कर्ष सकिएको थियो। हिजोको बैठकमा केही केन्द्रीय सदस्य अनुपस्थित भएकाले महत्त्वपूर्ण निर्णय हुन नसकेको पार्टीको भनाइ छ।
शनिबारको बैठकमा चितवन–२ को उपनिर्वाचनबारे पनि छलफल भएको थियो। त्यहाँ छिटो उपनिर्वाचन गर्नुपर्ने उसको माग छ।
सभापति रवि लामिछानेले नागरिकता प्रकरणमा सांसदसँगै गृहमन्त्री पद गुमाएपछि पार्टीभित्र खैलाबैला मच्चिएको छ। सरकार गठनका बेला भएको सहमतिअनुसार गृह मन्त्रालय आफूले पाउनुपर्ने माग रास्वपाले गरिरहेको छ। गृहमा रवि नै फिर्ता हुनुपर्ने जिकिर पनि उसको छ। त्यसो नभए सरकार छाड्ने धम्की रास्वपाले दिइरहेको छ।
यसअघि बिहीबार बसेको बैठकले माग पूरा गर्न प्रधानमन्त्री पुष्पकमल दाहाल प्रचण्डलाई दुई दिनको समय दिएको थियो। उक्त समय शनिबार नै सकिएको छ।